Temesepba Mozü shibelener 3 apu

Guwahati, Monupii (May) 23 (Agencies): International jenjang nung temesepba mozü shibelena ayokba telok nungi nisung asem tashi Sangtennü puogo. Parnok ket nungi heroin sen crore 24 alang ngutetogo, ta police sangdong ka ajanga metetdaktsü.
Aija alirtem ya Taibali (Manipur), Islamuddin aser Shohidur Rahman Jodder (Assam) ta jangjaogo aser parnok ket nungi heroin seret 6 puogo, ta parnokisa shisem.
Special Cell puri Manipur, Uttar Pradesh, Delhi, Punjab, Assam aser West Bengal nunger amala tesem nung international jenjang nung temesepba mozü shibelenba indang osangtsüsang agia liasü. Deputy Commissioner of Police (Special Cell), Pramod Singh Kushwah-i ashiba agi, parnoki item shibelenertemi Manipur nungi heroin jenjang tajungtiba belenshir, ta ngutet.
Monupii (May) 20 nü Taibali ya Delhi-i Indraprastha Park, Ring Road tesem nung parnok külem inyaker ka nem heroin agütsütsü aruba osang angazük.
Iba sülen Indraprastha Park bus stand nung parnok aputsüba atema tasa asar ataa liasü. Mapang tatsüka lir Taibali ya bag ka bener aru aser iba sülen Islamuddin aser Jodder na ISBT len nungi aru, ta Sarai Kale Khan-i ashi. Parnok asem ajurutepba sülen parnok apu.
Ken o ashishiba mapang nung parnoki, parnok ya Manipur nung temesepba mozü shibelenba nisung ka atema inyaker, ta ashi.
Taibali-i ashiba agi, pai bena aliba mozüji iba nisungba yagi agütsüba liasü. Paisa ashiba agi, parnok rongnung tekolakba ya Myanmar nung mozü shibelenertem den sendaktepa lir aser iba mozü ya parnok ket nungi alizükba lir, ta police-i ashi.
Manipur arrtsülen ozüng alema opium kanga bulua tsüner aser temesepba mozü yanglurtemi opium nungi heroin yanglur, koba parnoki linük nung tesem balalai belenshir, ta Kushwah-i ashi.
Taibali-isa ashiba agi, Myanmar nungi shibelener adokba heroin ya Manipur nung yangluba dang nungi kanga agi jenjang tajungba aser dalangba lir. Myanmar nung yangluba Heroin ya India nungdang masü saka bendanglena kanga bulua bushir, ta DCP-i ashi.
Taibali-i taoba küm asem tashi Africa nunger ka densema pa den sendaktepa alirtem nem mozü agüja arua liasü. Pai tang tashi nung heroin seret 120 bo agütsüadokogo.
Paisa NCR, UP, Punjab, West Bengal, Assam nung mozü ayokertem nem heroin agüja arudar. Pai heroin ya Manipur nungi Delhi-i aruba tata gari tem nung meima bener arur.
Taoba küm ana asem tsüngda Manipur aser Myanmar nungi India nung tesem balalai heroin shibelenba tali kümogo, ta DCP-isa ashi.