Ozüng alema bendanger state aitba nokdangtsü Berin-i nangzük

Imphal, Monupii (May) 23 (Agencies): Manipur chief minister N. Biren Singh-i Sangtennü ashiba agi, par sorkari taruba Assembly session nung state nung lisopurtem kümzüka ayutsüba atema bill ka benoktsü.
Imphal East district nungi Rohingya nunger ti apuba sülen anogo ka lir sorkari bendanger tem senoka aitba nokdangtsü asoshi sentong balala yanglua inyakbatem indang osangbenertem den jembidang pai iba olen ya ashi.
State-i bendangertem kuli kaket tejangja mebeni aitba tali akümba indang jembidang Biren Singh-i ashiba agi, “Ozüng alema bendangertem kodangser Imphal tong arutet, ta ni kanga süngmanger. Iba ajanga asen nisungtemi parnok yimti nung arua alitsü asoshi teyari agütsüba sayur. Iba amala inyakyim ya aitsütsü tetemsü lir,” ta pai ashiba den nüburtem dang bendangertem nem teyari magütsütsü asoshi mepishi.
Paisa ashiba agi, Taoba küm Metsüremi (March) state nung BJP-i aniba teloki sorkar kümtetba sülen ozüng alema bendangertem state-i arua alir parnok 100 shi jangjaogo aser parnok 36 tepuokdak yua lir. Sorkari bendangertem jangjatsü asoshi sentong aika achaayanga inyakogo aser item ya nokdangtsü asoshi jenjang tapet agidar, ta paisa ashi. Maneni ozüng alema bendanger arua alirtem nem Aadhaa card taila agütsüba purtem tawa puogo, ta paisa ashi.
Chief minister-isa ashiba agi, Monupii (May) 14 nü nisung shibelener asem densema ozüng alema kuli kaket tejangja mebeni parnok 10 Myanmar nungi Manipur-i aruya aliba mapang nung Moreh police station anasa puogo aser maneni sorkari iba amala nisungtem nokdangtsü asoshi inyaktsü, ta shisem.
Citizenship (Amendment) Bill, 2016 dak sendakba nung ashishidang pai ashiba agi, iba dak sendakba nung Manipur nunger kecha shilem mali.