Government nung tapok

Nagaland government inyakyim nung tapok aika lir, iba jagi senotsü aika enoktsüyonga masünger aser terenlok mapa inyakba nunga temong makar. Item tapoktemji matep tashi Nagaland asoshi sen kwika lemzüktsüdir lemzüktsüaka meperitsü. Item tapoktem rongnung tapok tulutibaji government inyakertem rongnung taila inyakertem tenüng nung ita sen agizüka agiba tapoktem asütsü. Taila inyakertem tetezü nisung shitakbabo mali ser nung tiyazü nisung tenüng nung ita sen agizüka agitsü asoshi züluoka ayuba tenüngtem lir. Itemji department kar nungbo puteta endokba angashiogo saka ano department tulu kar nungbo taila inyakertem tenüngji meindoki parnok tenüng nung ita sen agizüka agiba otsüa lir. Item department nungji nisung karbo ita nung nisung aika meyong ita sen agizüka agia alitsü. Aji oda, Nagaland nung government mapa inyakertembo aika saka office nung aser mapa inyakdak tesem nungbo mapa inyakertem mali ta asübaji, ashiko taila mapa inyakertem aliba jagi balaka inyaker züngsem aika akümer alitsüa akok. Item ama temulung melemi bilemba mapatem ya jungjunga reprangdangra shitak atalokba putettsü. Atangji, mapang mapang shia government-ia itemji bushir, ajisüaka nisungtem mejenbutettsüsa electronic oset ka amshia inyaker masü asünungji, taila mapa inyakertem ajakbo meputetter. Tanü Nagaland tajungba küma melenshidi süra nisung ajaki akok tashi ochishia inyakba sobaliba tenzüktsüla. Tanübo taila mapa inyakertem dang masü saka ano aikati pei melen tangar yoker. Iba amaji school aika nung tesayurtemi pei melen tangar ka shimer yoker aser ita sen lemdanga agir ta asüba tashi osang angashiogo. Tanü asenok ama Khristan taküm ka asoshibo itemji taaktsüka lir. Ajisüaka, asenok aika rongsen nem kokdaktsür asünungji, asenoki dang sen miimzüka agitsüsa lenmang ngurabang ochimashi inyaktsübaji kecha balaka bilema maiter aser ochimashi mapajiang shitakba amai inyaker. Iba amaji shitak inyakbajibo meshitak saka meshitak inyakbajiang shitak ta asüba state-ji Nagaland kümadokogo. Item ochimashi tapok ateptsü atema teinyaktsü kaji, government mapa nung inyaker shia meyong Identity Card-ji biometric system ajanga yanglutsüla. Kodang iba amaji pei meyong agi nema Identity Card yangludir, ibajibo taila meyanglutettsü. Tsüngremi yangluba rongnung tesüngmangtsü kaji nisung shia temeyong nung  tarentaren aliba ya khenyongi balala, nisung anata mesüktepa mali. Iba jagi Aadhaar card yangludangbo biometric system agi yanglur asünungji temeyong tuluba nemdaktsür. Aji oda, nisung ka pa meyongsa anaben nemer Aadhar ana meyanglutettsü, kechiyong ibaji computer-i magizüktsü. Iba kasa inyakyim nung kodang office nung inyakertema Identity card yanglua amshidir, ita sen agizükdanga iba ID card-ji amshitsü, anungji taila mapa inyaker tenüngtembo mali akümtsü. Idangjibo, Nagaland nung ya government mapa inyakertem ishika dang akümtsü aser pei lemzükba tesem nung shitak lia mapa shitak inyaktsü. Nagaland kümer joko küm 50 süiogo, anungji Nagaland ya tasen kümshia jungjunga yanglutsü atema government nung anogo shia tenüng ajaba yimya nungi tenzüka department kecha nunga taila mapa inyaker mayutsü aser taila mapa inyaker sen agizüka magitsü ta Naga nunger lanur mulungjang shia nung telemtetba agitsüla. Nagaland melenshitsüba yabo tang alirtem dak tuluka imlatsü mali, saka lanurtemi ochishia aser taküm ajak bendanga agüja inyaktsüla. Aji oda, tang Nagaland nung district headquaters shia gari lenmang tapok atepyonga aoba ama, government inyakyim nunga kongsa senotsü endokba memetettsüsa tapok ali, itemji atepyonga aotsüla. Alima melenshitsübaji kari takoksa aser timtem arema inyak tenzük nung dang temelenshiji arutsü. Aji oda, tanü lanurtemi taila mapa inyakertem tenüng nung ita sen agizüka machitsü mulungtetra, iba kisüng jagi Nagaland nung temelenshi tajung tulu adoktsü.