Mizoram nung mezüngbuba medical college amenoktsü

Aizawl, Monupii (May) 25 (Agencies): Centre-i Mizoram nung mezüngbuba medical college amenoktsüba atema temelaba agütsüogo. Iba college dang ya Mizoram Institute of Medical Education and Research (MIMER) ajatsü, ta Yangtepnü ketdangsertemi metetdaktsü.
Parnoki ashiba agi, medical college lapoktsüba atema Medical Council of India (MCI)-i recommend asüba sülen ministry of health and family welfare-i temelaba agütsü aser Sangtennü letter of permission (LOP) ka agütsü.
Ketdangsertemisa ashiba agi, medical college ka lapoktsüba atema benokdanga aliba ya MCi-i mapang balala nung asemben tashi asadangogo.
Rongchii (April) 4 nü MCI puri tatembangsa asadangba sülen parnoki Monupii (May) 2 nü Centre nem recommendation agütsü.
LOP ya Union ministry of health and family welfare, commissioner and secretary-i Sangtennü agütsü.
Medical college amenoktsüba ya MCI puri Indian Medical Council Act, 1956 Section 10-A kübok recommendation agütsüba sülen Centre-i temelaba agütsü, ta LOP nung shisema lir.
Maneni ministry ajanga Mizoram sorkar dang menden 100 atema academic session 2018-19 nungi bo tenzüktsü asoshi tetuyuba agütsüogo.
Medical college nung infracture shidak agütsütsü aser iba nung machine, teaching aser non-teaching staff aser MCI norms peridaktsütsü asoshi tenüngdakbatem ajak agütsütsü, ta LOP nung shia lir.
Mimer director Dr L. Fimate-i ashiba agi, central pool atema menden 15 mekazüka ayutsü aser tanungbaji state sorkari achaayangtsü.
“Applicants ajak NEET ajanga shimtsü aser admission atema entrance tatidang balaka magitsü,” ta pai ashi.
Ketdangsertemi ashiba agi, 2018-19 academic session atema class tem Luroi (Aug) nungi tenzüktsü.
Parnokisa ashiba agi, college nung ciurse asem; anatomy, physiology aser biochemistry agütsütsü.
MIMER ya Falkawn yimtsüng nung state referral hospital nung amendaka lir.
Tang college nung professor asem, associate professor pezü, assistant professor 28, senior resident doctor ti, junior resident doctor17 ser demonstrators 14 densema tesayur 74 lir.
State sorkari taoba Tripura High Court, Chief Justice T. Vaiphei mendenbuba asütsü asoshi shimogo.
Ketdangsertemi ashiba agi, iba medical college nung küm shia state sorkari sen crore 50 indoktsü.