Naga yimten latetnüra NPF nem vote agüjang

Dimapur, Monupii (May) 25 (TYO): Taoba Chief Minister aser NPF legislature party lennir TR Zeliang-i Mon jila nung NPF candidate, C Apok Jamir atema nüboyimtsüdang secular tangatetba aliba nisung ajaki C Apok nem vote agüjang ta ayongzük.
“Naga yimten latetdaktsünüra NPF nem vote agüjang, saka election talila aginüra NDPP nem vote agüjang” ta TR Zeliang-i ashi.
Congress, NPP, AAP aser BJP o JDU lennir kari NPF den yaritepba atema pelaba olen ka jembidang TR Zeliang-i ‘Secular Forces longjemba ajanga taruba by-election nung takok tulu angutsü’ ta ashi.
Nübortemi NPF aser NDPP tsüngda terata kecha malitsüla kechiyong NPF ya regional party ka lir saka NDPP ji Nationalist party ka lir, ta paisa shisem.
Tang teinyakdak PDA Chief minister, Neiphiu Rio-i Delhi-i aoba sülen Nagaland state nung mepetmesü adokdaktsü. Pai parliament nung minister menden mangu aser iba jagi pai kümsük metembangdang state politics-i tanaben meyipa aru aser taoba küm pezü tashi NPF sorkar anendaktsütsü merang. Iba ya pa jurila ajangzüktsü atema dang lir, ta TR Zeliang-isa ashi.
PDA sorkari anogo 60 nü District Headquarter lenmang ajak yanglutsü nangzükba aija TR Zeliang-isa ashiba agim, tang sorkari sen kecha bener maru saka taoba sorkari bener aruba sen ajanga parnok tenüng agir, ta ashi.
Sentong nung C. Apok Jamir-ia o jembidang Nagaland nung alirtemi pa nem vote agüjang ta mepishi.
Lok Sabha by-election ya Naga nunger tendangba mapang ka asütsü aser iba ajanga asen tarutsü yanglutsü. Iba election ya tanga tashitem dang nungi Khristan yimsü kümzüka ayuba mapang ka asütsü, ta paisa ashi.
Pa nem takok ngudaktsüra Centre nung pai Naga nunger ola ama mapa inyaktsü ta Apok-isa nangzük.