Iba election ya asenok asoshi tetendangba ka asütsü : C.Apok

Dimapur, May 25 (TYO): Nagaland nung tang agiba Lok Sabha by-election ya akhi ama zübazübaa bilema agitsüba election ka masü saka iba yagi asenok tarutsü tia dena melentsü ta NPF candidate Wabong C.Apok Jamiri metetdaktsü.
Yashi Brehostibar nü Dimapur nung NPF teloki ayongba election senden ka nung nisung meyirijang aika sendena alidak jembidang pai iba o ya metetdaktsü.
“Iba by-election ya Nagaland nung alirtem asoshi tamangba yimsü nung aser democracy meimertem asoshi tetendangba ka asütsü,” ta paisa ashi.
NPF candidate C.Apok Jamirisa lokti dang NPF teloki akok tashi Naga yimten tebilemtsü ya tatembang küma latettsüba mapa nung yariteptsü ta metetdaktsü.
Linük nung nübortem rongnung pei amangnütsü amangtsü aser tetsübu melii pei bilemba jembitettsüsa yimten tensa tia ka yanglutsü atema kasa tangatetba aliba yimten telok Congress aser Aam Aadmi Party Nagaland telok ama den longjemer inyaker ta NPF candidate-isa metetdaktsü..
Joko linük nunga yimten mopong balaka ondagi aser center government nung temelenshi yakta adoktsü ta opposition telok ajak longjemer BJP teloki aniba government anema nokdakba tensa tia indang C.Apok Jamirisa metetdaktsü.
Kasa senden nungsa jembidang, tang ama center government o Naga nunger linük tenzüker teloktem na tsüngda Naga yimten tebilemtsü latettsü indang jembiba mapang taoba Lok Sabha tatar aser tang chief minister Neiphiu Rio-i Lok Sabha menden toktsür taoba ita pezü tashi tazüng toktsüba ajanga tang ano election khen agishitsüsa akümba ya Naga nunger asoshi kanga takoksa asütsü ta opposition lenir, T.R.Zeliang-i metetdaktsü.
Paisa NPF telok ya shitakba Regional party-ji lir, kechiyong 1963 küm nungi antepong noksa ya khena memeleni tang tashi amshia arur saka NDPP telok yabo temeyoktep telok lir ta metetdaktsü.
T.R.Zeliang-isa tang state government ya NDPP teloki anir masü saka BJP teloki anir , saka NPF telokibo kodanga BJP nem manishidaktsü ta metetdaktsü.
Iba senden nung Rajya sabha MP K.G.Kenye, NPF MLA Kuzholuzo Neinu aser AAP tir Akavi N Zhimomi nungertemia jembia liasü. Iba senden nung tarur ajak pelaa agizükba o NPF MLA Moatoshi Longkumeri metetdaktsü aser taoba MLA Khekaho sentong nung menden liasü.