Congress-JD(S) teloktepi floor test takok angu

Bengaluru, Monupii (May) 25 (Agencies): Anogo 10 tashi Karnataka nung tashi atsütepa aruba sülen JD (S)-Congress teloktepi tanü Karnataka assembly nung floor test takok nguogo.
JD (S) lennir HD Kumaraswamy-i Chief Minister inyaktsü tezüngzüktep agiba sülen anogo ana lir tanü pai floor test nung takok angu. Tanü confidence vote agitsü jakdang taoba CM Yeddyurappa-i anir BJP MLA ajak kimai luadok. Ajisüaka, Karnataka CM HD Kumaraswamy-i voice vote ajanga floor test nung takok angu.
Tanü ibaji magidang Speaker indang election agi aser idangji Congress lennir tejen Ramesh Kumar-i takok angu.
Kumaraswamy-i nübo teimba ta kuli agütsüba sülen “Tang nungi mapa shitakba tenzüktsü, Karnataka nunger dang ni kechisa nangzükogo, itemji mapa küma inyaktsütsü” ta ashi.
Speaker K R Ramesh Kumar-i voice vote ajanga confidence vote takok nguogo ta oshidang agütsüdang BJP MLA tem assembly nung maliasü aser iba atema Kumaraswamy-i “BJP MLA temji jena aoba lir” ta ashi.
Züngsem 222 agi akümba Karnataka assembly nung sorkar akümtsü atema menden 112 nüngdaker. JDS-Congress teloktep nung MLA 118 dena lir (JDS 37, Congress 78 aser others 3) aser külen BJP MLA 104 lir.