BSP-i Congress den lokteptsüa akok

New Delhi, Monupii/May 26 (Agencies): 2014 küm Lok Sabha election nung BSP-i menden ka nung danga takok mengutetaka 2019 küm Lok Sabha election atema Bahujan Samaj Party (BSP) tongti, Mayawati party Ato kilonser candidate shimtsüa akok, ta osang angazüker.
BSP-isa Madhya Pradesh, Rajasthan aser Chhattisgarh assembly elections atema Congress den jelia lokteptsü atema bilemdar. Tesüiba hopta ishika Mayawati-i Delhi nung monga taruba elections atema asalentong yangluba den külemi candidate tem shima liasü.
BSP-i Uttar Pradesh state yimtenren nungdang masü saka National jenjang nunga ajemoka inyaktsü, aser ibaji Karnataka elections atema BSP-i Janata Dal Secular den loktepba ajanga jangjar.
Tan hopta Karnataka nung Congress-JDS teloktepi sorkar akumba tenangzükba agiba sentong nung Mayawati densema liasü. Kasa sentong nung Congress lenir, Sonia Gandhi aser TMC lenir, Mamata Banerjee na densema opposition lenirtem aikati opposition telongjem sayuogo.
Kasa sentong nung Mayawati-i Sonia Gandhi aser lar jabaso (Congress Tir), Rahul Gandhi na ajurua jembi.
Congress-i state asem nung BSP den lokteptsü atema asüngdangogo, ajisüaka tang tashi nungbo lai telangzüba aguja mali.
Karnataka sorkar tenangzükba agiba sentong nungsa Mayawati-i Samajwadi Party tongti, Akhilesh Yadav ajurua jembi. Ano Trinamool Congress tongti aser West Bengal Chief Minister, Mamata Banerjee-ia Mayawati ajurua jembia liasü.