Modi-Shah ji linük atema lendong ta nüburtemi metetogo: Congress

New Delhi, Monupoii/May 26 (Agencies): Tanü Congress-i, NDA yimsüsüba küm pezü sülen tanübo nüburtemi Narendra Modi-Amit Shah naji linük atema lendong ta metetogo, ta aitsü.
Congress-isa Centre sorkar küm pezü yimsüsüba mapangji ashioktsüba, külakotsüba, mangyangba aser yazü jembiba mapangtem liasü, ta ashi.
Modi-i aniba sorkar küm pezü ajungba anogomong nung Congress-i kaket tila ka ‘India betrayed’ sayadang Congress lenirtem- Ghulam Nabi Azad, Ashok Gehlot aser Randeep Surjewala nungeri, NDA yimsüsüba kübok tetsübu aser tesempa tensa ka yangluogo, ta aitsü.
AICC communications in-charge, Surjewala-i, “Tangbo nüburtemi Modi-Amit Shah naji linük atema lendong ta metetogo. Modi sorkar küm pezüji lenla pezü nung ratettsü akok- ashioktsüba, külakotsüba, mangyangba aser yazü jembiba,” ta metetdaktsü.
Dalits, tribals, minorities aser tetsürtem anema inyakba mapatem dak sendakba nung Rajya Sabha nung Opposition lenir, Ghulam Nabi Azad-i, “BJP sorkar kübok shinga kümzüka mali. Nisung shinga ayip-janga memejangteter,” ta ashi.
Külem osangbenertem senden nung jembidang AICC General Secretary, Ashok Gehlot-ia, “Tesüiba küm pezü Modi sorkar mapang nung tetsübu, tesempa aser rara tensa yanglutetogo,” ta ashi.
Congress-i ‘India betrayed’ kaketji English aser Hindi oshi naprong nung adoka sayaogo, aser iba kaket nungji Ato kilonser, Narendra Modi dang tasüngdangba 40 asüngdanga lir.
Mahila Congress tongti, Sushmita Dev-i, Modi sorkar yimsüsüba kübok linük nung tetsürtem joko kümzüka mali, ta ashi.
Youth Congress tongti lenir, Keshav Yadav-ia, lanurtem asoshi tarutsü tia tammang, kechiyong mapa angutsü atema maongka junga mali, ta ashi.