Taküm nung ayi aser sang

Tsüngremi Pai meimba Israel nungertem, parnok nem lemzüktsüba temo aketba Canaan lima nung
timtem tatidang kecha melii jangratema alitsü asoshi teinyaktsü mapa tejangja ana agütsü. Ibaji ka, Israel nungertemi Canaan lima tashi makyonga aodang, parnok tsükchir kintem den tezüngzüktepba ken o kecha meyanglutsüla aser ano tanga teinyaktsü kaji, parnoki bendanger tsüngrem külemdak tenladak ki ajak raksatsütsüla. Iba o ya kenü anogo Israel nungertem dang Kibuba tenyar kati nenshia metetdaktsüba otsü Obendanger tapu 2 tetenzüklen shia angutsü. Aji oda, Tsüngremi Israel nungertem nem inyakdaktsünüba mapaji, parnok anemertemji parnok alidak nungi meshimeshia aridoktsüla aser parnok anasa konga bendanger tsüngrem külemdak tenla ki malitsüsa raksatsütsü mapa nungloktsübaji liasü. Atangji, Israel nungertemi matsüngtet tsüngda Canaan aser temeket nung alirtemji tashi tait kintem, parnokji rara nung tesashi aser parnok mitsaji kanga akanga yanglua liasü. Aji oda, kodang Israel nungertemi Tsüngrem tashi nung item tsükchirtemji makyonga ao, parnoki Tsüngremi nungloktsüba ama tsükchirtemji kata anünga meyutsüi makdoktsü melen, parnoki item bendangertem den tangatettep nung külemi alitsü asoshi tezüngzüktepba yanglu aser parnoki bendanger tsüngrem külemdak meraksatsüi wazüka yutsü. Ashiko, Israel nungertemi bendangertem taküm aser tenla ki wazüka yutsübaji bendangertemji makoktsü südi ta arendakba ajanga asütsüa akok mesüra bendanger tetsürtemji topur ajungba agi item nemji puadaktsü asütsüa akok. Aji oda, Israel nungertemi Tsüngrem taochi aser tashi amadoker temenentsürtem den nüktapangta benshiba aser bendanger tsüngremtem külemdaki aoba tatalokbatem Züngdangba tapu 25 nung kar shia angutsü. Aji oda, Israel nungertemi Tsüngremi ashiba mangai Pa jashidaktsü nungji Tsüngremi parnok merenshi aser parnoki wazüka yutsüba bendanger aser bendangtsürtemji teti parnok asoshi ayi aser sang ka ama liasü. Item jagi mapang-mapang shia parnok timtemdaktsü aser item purtem denji külemi lisemdang aiben tatidang nung tsüker Tsüngrem jashidaktsü. Iba amaji tanüa asenok Khristan taküm nung asenok temulung meyipba mapang, tsübuba agi mesüra apayuba agi meraksai toktsüba temenen jakla aser shisatsü aika asenok mulungjang nung alitsüa akok. Asenoki Tsüngrem meteta lir, saka asenoki item temenentemji kodanga shia marutsüsa raksaa meindokba agi, anogo shia item jagi asenok kangshir aser item tatidang sang nungji asenok tsükpet tsüker. Iba jagi Tsüngremibo asenok kanga meimer ser nung aser Paibo asenok kanga moatsüner ser nung, asenoki item temeim aser temoatsütemji magizüktetter. Koba anogo nung asenok Tsüngremi temenen nungi aniteta kümzük, iba mapang nung jagi Tsüngremi asen dak aliba temenentem anema tanüla tongpang ayongzükogo ta asenoki tanüla nung angatettsüla. Iba anogo nung jagi asenok taküm ya anogo shia tongpang nung rarar sepai amato ka akümer. Aji oda, iba anogo nung jagi asenoki bilemba, benshiba, achi-ajemba aser inyakba temenen mapatem anema asenok kanga sashia nokdaktsüla aser item temenen mapatemji sempatsüla aser meshimeshia raksatsütsüla. Asenok taküm nung tongpang tulutibaji iba tanüla tongpangji lir. Iba tongpang akokertem nem takok korang yuja lir ta Tsüngremi ashir. Tanü nü taküm nung item temenentem anema raraba tongpang mekokteti timtema lira, Tsüngrem dang tanüla temeshi nü dangi yokang ta shiang. Tanüla temeshii asenok yaritsü teti renema dang lir aser tanüla temeshi tashi agi makoktsüba timtem aser tatidang kecha maka.