Küm 37 sülen Japan -i Uber Cup kokogo

Monupii (May) 26 nü Bangkok, Thailand nung BWF Uber Cup 2018 final nung Thailand team akokba sülen Japan team sempet agütsüba sentong nung pelatepba noksa nung angur. Japan tsürtemi Thailand team 3-0 agi koka title benogo.

Bangkok. Monupii (May) 26 (Agencies): 1981 küm akokba sülen Japan team-i tang mezüngbuba Uber Cup kokogo. Küptoknü IMPACT Stadium nung final asaya nung parnoki Thailand 3-0 agi akok.
Coach Park Joo Bong-i iba takok ya parnok asayartem jenjang temaba nung asayaba aser rangking nunga jenjang temabai atuba ajanga lir, ta ashi. 2014 küm New Delhi nung parnok China sülen tanabuba jenjang nung tembang.
Uber Cup final nung World No 2 Akane Yamaguchi-i Japan tsürtem atema mezüngbuba takok agütsü, lai mezüngbuba kija asaya nung Ratchanok Intanon 21-15, 21-19 agi akok.
Asaya tembangba sülen sensaksemba mapang nung arishi küm 21 tain japan tsürla yagi ashiba agi, “Ratchanok akokba ya jangratemtsüka lir, ajisüaka iba takok ya kija takok ama mebilemer. Onoki idaki ajangtetba ajak ya Japan nunger atema lir.”
Tetsür tarep asaya nung World No 2 Yuki Fukushima-Sayaka Hirota aser Thai tetsür tarep asayar Jongkolphan Kititharakul-Puttita Supajirakul na 21-18, 21-12 agi ayong ayonga akok.
Iba sülen world champion Nozomi Okuhara-i 21-12, 21-9 agi Nitchaon Jindapol madak ayong ayonga takok angu aser parnoki iba asayamung akok.
Iba takok sülen Japan team taruba China nung World Championships aser Lorui (Aug) Indonesia nung Asian Games asayatsü aliba dak rangloker inyaktsü.