Kim den senden amentsü ano teimla lir : Donald Trump

Washington, Monupii 26 (Agencies) : North Korea lenir, Kim den senden amentsüji ano teimla lir, ta US Tir, Donald Trump-i temulung lemteta metetdaktsüogo.
US o North Korea naprongi par lenir ana tsüngda senden amentsü aliba indangji kanga dang tsükaronga jembidagi saka senden amentsü atema tanaben jembishir amato US Tir, Trump-i kuli kar sayuogo.
“Kechi komaka asütsüar onoki angutsü. Onoki tang parnok den jembidagi,” ta White House kimalen osangbenertem den jembiba mapang Trump-i metetdaktsü.
Kim den senden amentsü aliba thinener ta Trump-i metetdaktsüba sülen anogo ka dang lir ano osangbenertemi pa dang atangji Kim den ajuruteptsü asü masü (?) ta asüngdangba olen ka langzüdang pai (Trump) iba telangzübaji agütsü.
Yimtenren tsütsü mapa jet-jeta meinyakteter, ta North Korea-i US tadong tir, Mike Pence anema jembiba sülen Trump-i Kim majurutsü telemtetba metetdaktsü.
Aji oda süaka, North Korea-i mashi mapang ka nung keno lemtepa jembitsü tejangraba lir ta atsüanema metetdaktsüba sülen, “Parnoki kanga junga metetdaktsüogo. Komaka asütsüar repranga lidi,” ta Trump-i metetdaktsü.
US Tir-isa ashiba agi, taoba nung renema aliba ama shibai metet Aami 12 nüji senden katettsüa akok.
“Sendenji Aami ter ananüa litettsü meteta maka,” ta Trump-isa nenshia metetdaktsü.