Government meimtsüla

Government ta asüba ya government nung alir yimten yimsüsür, ketdangser aser government mapa nung inyakertem meyong masü saka nübortem meyong lir. Government-ji nübortem tashi agi akümba aser nübortem atema teyari aser temoatsü angudak lir, anungji ajaki government meimtsüla aser akümtsübutsüla. Government nung alirtem gari tajung nung senzübaji, ki tajung nung alibaji aser ita sen tajung achiba ajakji nübortem anepalutsü atema agütsüba taa lir, anungji iba khuretji meteta government nung alir aser government mapa inyakertemi government aküm meraksaktsüsa nübortem meima tenzüktsüla. Tanü ama taoba ajaklen government majungba indang jembia angashidang, süra government ya mali nunga koma süla (?) ta bilemer. Atangji, government nung alirtemi nübortem meima metenzükaka, government ya mali nungbo nisung ajaki pei sünütsü asütsü aser shibai tashiyim tuluba amshitetdir pa jagiang yimsü asütsü, anungji nisung tamajungtibaji nübortem madak lenir asütsü. Tanüa government liakasa maparen aika nung nübortemi mulungba nung masü saka tashiyim amshia nisungtem tsübutsüsa inyakertemi mulungba nung dang government aoba angur. Ajisüaka,  ano nübortemi teimlabo mesamar aser government aliba temaitsüjia terabo metetter. Iba amai government-bo lir saka temzüng ozüng shitak  mamshiteter ta  tezüdangtsü tia ka nung alidang, asen lima ya tajungba küma yanglushitsü asoshi   government nung alirtemi shitak yimsü asütsüla, government mapa inyakertemi shitak tenzüktsüla aser nübortemia tashiyim agi mesüra angati anguba rongsen agi taküm alitsü memerangi senso tajung ka ama pei lima asoshi meranga aser nendaka inyaktsüla. Asenoki jungjunga reprangdangra, Nagaland nung Naga nunger ajaki government mapa inyakner saka government-bo memeimer ta reprangtettsü. Government mapa inyaknertemi government meim nungbo mapa shitak inyaktsü aser government meyong senotsü kanga ochishia amshitsü. Government nung alirtemi government meim nungbo pei dang nungi nübortem temeimba meima government tashi amshia nübortem yaritsü. Aji oda, government tenzükertemi government meima tenzükra government lenmangsa tajungba, government mozü kisa tajungba, government kaketrejutemsa tajungba aser government kiojensa tajungba asütsü. Tanübo bilemdangdi süra, nisung aikati government tesayur inyakner saka nisung shingaia government school nung mezüngner, nisung aikati government mozü kidang inyakner saka nisung shingaia government mozü kidang taneptsü bushii mouner, nisung aikati government mapa bushir saka nisung shingaia government oset apayua mamshir. Iba tangatetba shisatsü ya melenshi nung dang Nagaland junga adoktsü. Delhi nungi dang masü saka tanga bendang limatem nungi dena terenlok mapa inyaktsü tenüng nung senotsü aika bener arutsüa akok saka asenoki government memeim tashi item senji shitak ochishia mamshitettsü. Asenoki government memeim tashi government tenüng nung inyakba mapa ajakji tiyazü asütsü. Alima ajungtsü atema government dak aküm alitsüla. US government mesüra British government ta angashidang temulung lema aser akümketa bilemba ama, Nagaland government ta asüdangji nisung ajaki akümketa aser temulung lema bilemtsüsa government nung alirtemi aser government tenzükertemi pei yimten yimli akümketdakja tenzüktsüla. Kenü ki aoker kati office shitak maokba, kenü police kati süoshi shitak agir mesenzüba, kenü tesayur kati lesson shitak mesayuba, kenü mozü kidang inyakertemi mapang shitak mamshiba, kenü mapa nung menendakba agi light meyoktetba, kenü office nung inyaker kati file menudaktsüba, kenü nisung kati mapa ka mashimashi inyaker toktsüba  aser kenü nisung kati sübokrem tilaka agi tenzükba nungi pei nübortem rongnung temulung melemtep tenzüker. Iba amaji yimten aküm aser tashi terara samatsü tenzüker.  Tanü Nagaland tia yangji lir. Asenoki iba tia nung jagi asen temeim tetsü taso lima Nagaland kümzüktsü asoshi pei kija ajungtsü aser akatsü memerangi, pei dang nungi Nagaland temeimba meima mapa ajak nung ochishia inyaktsü merangtsüla.