TN sorkari Tuticorin nung Sterlite plant shibangtsür

Tuticorin, Monupii (May) 28 (Agencies): Tamil Nadu sorkari Tentonü (Hombar) state Pollution Control Board dang Vedanta group indang Sterlite copper plant teti atema shibangtsütsü tetuyuba agütsü.
Taoba hopta iba copper plant anema lungkak aitba sentong ka agidang nisung 13 tashi police-i khaset.
Chief Minister E Palaniswami-i ashiba agi nübortem taginüba nung ajemdaker iba telemtetba agi.
Taoba hopta Madras High Court nung Madurai bench-i Tuticorin nung aliba Sterlite Copper smelter plant ulushitsü indang ken o anena atatsü oshidang agütsü.
Sorkar tenüng nung tanü principal secretary M Nasimuddin-i Tamil Nadu Pollution Control Board dang iba plant teti atema shibangtsütsü tetuyuba agütsü.
Tanü Deputy CM O Panneerselvam-ia Monupii (May) 22 nü police-i injang khatokdang yirurtem semdang aser Thoothukudi nung aliba Vedanta group indang Sterlite copper plant teti atema shibangtsütsü atema sorkari mapa inyaktsü ta ashi.
Nisung 13 tashi asübaji kanga dang tesasatsü aser tejashitsü tatalokba ka lir aser iba ajanga nisung ajak mulung nung kongshiogo, ta Panneerselvam-i ashi aser tasür kibong ajak den asükhu lemsateper ta shisem.
Monupii (May) 22 nü Tuticorin nung lendong atalokba sülen Amungnü (Deobar) Tamil Nadu ketdangsertemi iba tesem nung CrPC Section 144 agiena liasü.
Sterlite Copper ya Vedanta Limited indang copper unit ka lir aser taküm Tsüklai (February) ita company-i Thoothukudi (Tuticorin) nung aliba unit ulushitsü ta osang ka metetdaktsüba sülen nübortemi lungkak aittsü tenzük.
Lungkak aitertemji Kumarattiyapuram nungi activist aser yimdaklirtem liasü aser parnoki küm 20 dak tema iba copper plant anema lungkak aityonga arur. Parnoki ashiba agi copper plant aliba ajanga temeket nung tzü menentsür aser temang nung timtem balala adoker.