Mkg nung polling noklang nung 85%-i shilem agi; Küpza nung EVM kol raksatsü

Mokokchung, Monupii 28 (TYO): Tentonü Lok Sabha MP menden ka atema Nagaland ajunga nung bye-election agiba den külemi Mokokchung district nunga polling station 226 nung polling noklang shilem nung 85%-i shilem agiba osang ajanga angazüker.
Tanü nikongdang 12:30 ako meta 26 Aonglenden Assembly Constituency kübok Küpza yimdak mejangjatetba nisung kari Küpza polling station maka vote ajenba kol Electronic Voting Machines (“EVM”) raksatsü, ta Mokokchung Deputy Commissioner & DEO, Sachin Jaiswal-i osangbenertem den jembidang metetdaktsü.
Iba EVM kol raksatsüba mapang joko vote noklang shilem nung 77%-ibo ajenadoker liasü aser EVM raksatsüba sülenjibo vote ajenba maparenji anenadok saka EVM kol raksaba dak alaka Voter Verifiable Paper Audit Trail (VVPAT) bo shitak lir, ta Mokokchung DC & DEO-i kuli agütsü. Iba maparen dak sendakba nung nisung tenet (7) pua lir, ta paisa shisem.
Tanü Küpza yimdak kechi atalokogo, iba indang osangji bangdaki Election Commission of India (ECI) dangi yokogo, anungji, iba osang dak ajemdaker ECI-i kechi tetuyuba agütsüdir, iba sülenjiang re-poll asütsü asü masütsü’ar metettsü, ta paisa ashi. ECI nungi osangji Monupii (May) 29 nikongdang tashi nungbo angutsü imlar, ta paisa shisem.
Tanü Küpza yimdak EVM raksatsüba osang dakji alaka iba osang yok tashi nung tanüngba Mokokchung district kübok polling station kecha nunga timtem lendong atalokba maliasü. Tanba bye-election nung yabo Ao lima tesem ajak nung amai polling kanga süngjema agiba osang ajanga angazüker.
Iba election sünepa agitsü atema Mokokchung district nung mitkar (security) ajak senteperbo coy 13 amshia liasü. Polling station 226 nung polling ketdang asütsü atema ketdangsür 1920 yoka liasü. Mokokchung district kübok assembly constituency 10 nung ya voters ajak agi 136883 lir.