Sangma-i NPP sorkar dang ‘ad hoc’ sorkar aja

Tura, Monupii (May) 29 (Agencies): Meghalaya nung opposition lenir Mukul Sangma-i Tentonü ashiba agi, National People’s Party (NPP) puri aniba sorkar ya “ad hoc” sorkar ka lir shirnoki parnok menden toktsütsü asoshi mulunga mali. Ampati menden election result sülen par party puri kokra parnok ya single largest party asütsü.
Sangma, shibai iba constituency nungi trokben tashi election kokogo, pai ashiba agi, pa iba menden toktsütsü asoshi tang ya mapang tajung lir.
“Nüburtem tenzüktsüba atema lenir tasen adokdaktsütsü asoshi lenmang lapoktsütsü tang ya mapang tajung lir, shirnoki ni aser party nungita yariogo. Onoki takok tajung angutsü imlaa atar,” ta Sangma-i ashi.
Mukul-i Songsak aser Ampati nungia election koktetba sülen tang pai Ampati menden toktsüogo. Congress puri iba menden nungi tokteptsüba atema Mukul’er jala tantsüla Miani D. Shira shimogo.
“Election akoktsü makoktsü indang jembitsü tang ya mapang shidak masü. Meghalaya nung politics ya kanga balaka lir. Tang state nung ama masü Meghalaya nung jangjajang ka maliba aiben nguogo. Meghalaya nung sorkar anitsüba ya asayamenü ka masü,” ta Sangma-i ashi. Pa ya Meghalaya nung küm pongu tembanga inyakba CM tasembuba dang lir.
1972 küm Assam nungi razüka state tasen ka akümba sülen Meghalaya nung tang tashi nung Chief Minister 12 tashi-i yimsüsüogo.
Maneni Sangma-i tang aliba state sorkar dang “ad-hoc” ta jatsü.
“Tang aliba sorkar ka “ad-hoc” sorkar ka lir kechiyong chief minister dena tang tashi MLA ama meshimi lir. Pa tang tashi parliament nung züngsem ka lir. Iba menden yaa tazüng liasü, pai iba menden nung toktepteter lila. Pai kechiba iba menden nungi metoktepar ni mangateter,” ta Sangma-i CM tilutsü.