Küm 4 tsüngda J&K nung kiralongrar 619 tashi tepsetogo: Rajnath Singh

Lucknow, Monupii/May 29 (Agencies): Narendra Modi-i aniba sorkar kübok internal aser external security atema junga inyakba mapatem metetdaktsüdang Union Home Minister, Rajnath Singh-i, tesüiba küm pezü tsüngda Jammu & Kashmir nung security sepaitemi kiralongrar 619 tepsetogo, ta metetdaktsü.
Tanü Lucknow nung aliba Lok Bhavan nung osangbenertem den jembidang Rajnath-i, temeshi ita Ramzan mapang state nung kiralongrartem anema rara anenba ya khenpiga asoshi dang lir, ta ashi.
“Iba ya ceasefire masü saka khenpiga atema operation anena atar dang,” ta pa ashi.
BJP lenirisa, UPA II sorkar mapang nungbo kiralongrar 471 dang tepset, ta ashi.
“Linük telongjem aser akhümket nungbo atsü-anem khenyongi malitsü, ibayongji onoki kiralongrar aser tamajungertem anema sashia inyaker,” ta pai ashi.
Kasa mapang nung security sepaitema kwi asü? ta osangbenertemi asüngdang, ajisüaka pai iba telangzübajibo magütsü.
Linük tenzükba mapang nung taküm tenla agüja asür sepaitem indang kibongtem nem Union sorkari teyari sen lakh 50 agüja aliba nungi sen crore 1 kümtsüogo, ta pai ashi.
Rajnath Singh-isa, Modi sorkar yimsüsüba mapang- tesüiba küm pezü nung arrtsü adena aittsü merangba kanga ajema kümogo aser northeast nung rara shilem 85 ajema kümogo, ta ashi.
UPA yimsüsüba mapang nung Maoists dak sendakba tatalokba 2,418 liasü ajisüaka NDA sorkar yimsüsüba mapang nung item ama tatalokba 1,481 dang liasü, ta pai ashi.
“2013 küm Maoists telungpurtem district 76 nung yakyaka liasü, ajisüaka tesüiba küm pezü nung district 58 dang kümogo,” ta pai shisem.