Karnataka nung ama Assam nung meinyaktettsü: BJP

Guwahati, Monupii (May) 29 (Agencies): Citizenship (Amendment) Bill, 2016 agizüktsü aliba nokdangtsü atema Assam nung Congress party puri BJP madenba sorkar ka kümtettsü atema party tem jaokba sülen anogo ka lir Tentonü BJP puri ashiba agi, iba tebilemdangba ya kodanga mataloktsü kechiyong iba ya ochi dak amendaka mali, ta ashi.
“Karnataka nung ama BJP medeni sorkar ka kümtettsüba atema Congress puri merangba ya tebilemdangba ka dang lir. Iba inyakyim ajanga kodanga ochibaji memelenshidaktsütettsü, kechiyong tang aliba teloktep sorkar ya nüburtem mulungba nung kümtetba lir,” ta BJP state president Ranjeet Kumar Dass-i osangbenertem dang ashi.
Aami (June) 30 nü National Register of Citizens tanabuba draft sangdongba sülen state sorkari bill anema nokdaktsü, ta shia Dass-i ashiba agi, “Onok tsüngda telungjem ya tezüngzüktepba takang ka nung amendaka lir aser Congress pur tebilemdangba ya kodanga mataloktsü. Iba teloktep sorkar ya meneni aotsü.”
Paisa nüburtem dang otsü olem balala nem manokshidaktsüi kanga junga bilemdanga inyaktsü mepishi.
Amungnü BJP MLA Rituparna Baruah-i lokti kari chief minister Sarbananda Sonowal tenüng menentsütsü asoshi sentong yanglua inyakdar ta ashiba indang asüngdang dang, Dass-i ashiba agi, “MLA-i kechi tensa dak ajemdaker iba olen ya ashiar ni mejangja. Ni pa dang iba ya asüngdangtsü.”
BJP state unit, General secretary, Dilip Saikia-i ashiba agi, “Congress puri nüburtem mangmangdaktsütsü asoshi meranger shirnoki BJP-i aniba teloktep sorkar nem state küm pongu yimsü asütsü asoshi nongloktsü. Congress puri tasa asaba ya nüburtemi kodanga magizüktsü.”
Paisa ashiba agi, AGP puri kodanga Congress den melungjemtsü kechiyong ibaji parnok tamendakdak anema asütsü, ta paisa shisem.