Election junga agitettsüla

Taküm 2018 kümsa Nagaland nung ashia-ashia election anaben tashi agiogo. Iba election ya matongdangyongi election timi agitsü asoshi Arogotemi anir lokti tentet balalai nübortem nem tangatetba agüja kanga meranga inyakogo. Atangji, meranga inyakba shibo Nagaland ajunga nung election junga agitsüba ser nung, tesem aika nung akhi ama sen aser tashiyim amshiba mapatem atalokogo. Ajisüaka, iba jagi election timi agitsü merangba mapatem tamakok angur ta masü saka ano temerangba inyaktsü alima tensai akhanger ta angatetter. Election timi agitsübaji junger ta ajaki angateta lir aser ajaki election timi aginür, ajisüaka kechisüdir süaka takok angutsüla ta bilemdang, kechi shitak ta bilemer masü saka komaser takok angutsü ta bilema inyaker. Idangji, nisung aikati sen crore aika endokyonga aser nisungtem lendong ajurutsüsa inyakyonga tadokdang adokerbo, kecha masü ta bilemer. Aji oda, Tsüngremi mulungba inyakba agi election nung madoktsü agibo temeneni mulungba inyaka adok tajungba ta nisungtemi angatetter. Iba tangatetba jagi asenok ochimashi aser tashiyim amshiba lenmangi anir. Iba tia aser tangatetba nung tadoker aser madokertem aika nisung nüchibo memesük yiar ama toktepogo. Aji oda, senotsü crore aika endoka yiar ama toktepnungji madokertembo yutsür tadokertemang shisa tebuluba bolua yimsüsüba menden nung mena lir. Asenoki yimsüsütsü shim saka yimsüsütsü asoshi masü saka sentsüh aotsüang bilemtsüsa asenoki tatar shimtetbaji, tatarsang kijaji masü saka asenok ajak telongi alu tenzüker asütsü. Iba ama election agidang aser agir külen asenoki election nung shilem agiba mapatem bilemdangdang, kechiba asenoki asenok jakla aser inyakyim ya memelenshitettsü (?) ta bilemer. Asenok ajak tashitemetettertem lir, kechiyong asenoki zülutsü aser azüngtsü akoker. Asenok ajak dak tajung aser tamajung, shitak aser meshitak bendangtettsüsa Tsüngremi shisatsü enokja lir, anungji iba shisatsü jagi asenoki election mapang aser election mapang masüdanga kechi shitak, ibaji shimtettsüla. Aiben asenoki ochi yoka takok bushir, idangji takokbo angur saka ochi malinungji temoatsü malir. Ibaji asenok ajaki angatettsü junger. Ochimashi agi takok anguba menden aser ochimashi agi bendenba rongsenji semchir tashi agia senmang mamangtettsü. Itemji pongmang ama ka dang asenoki ngua lia samatsü. Joko, asenoka tazüng tashir aser tangatetter amato election nung pei vote pei enokja tesünep nung election agitsü mapang tongogo. Election nung ya joko sen amshiba aser tashiyim agi akoktsü merangba sobaliba ya endoktsüla. Tanü asenoki Election nung kechi südirsüaka takok angutsü asoshi mapa tamajung inyakba agi asen lima telongi luja luogo. Joko, tsürabur aser lanurtem asoshi election mapang ya dang ayangdak mapa tajung ka angu ama bilema, pei vote dang masü saka tangar meyong vote agütsütsü atema dena sen meshia agir. Atangji, item ajakji makamaitba ajanga lir, anungji tatidang arudang metsüktsüsa nübortem yaatzüraa medoktsütsüla. Item ajakji yimsüsür aser ketdangsertemi tarutsü küm noklang indang bilema asen lima nung yimten inyakyim ajak shitak tenteta yutsütsüla. Asen lima nungbo kechiba election junga magitettsü (?) ta teti bilemer. Ibaji asenok ajak atema tayongzükba tulu aser tongtibangtiba kümdaktsüdi. Asen lima nung joko election mapang sen aser tashiyim mamshitsü, yi mejemdaktsütsü aser mozü mechidaktsütsü saka lanurtem dang nüchi lenmang sayutsü aser nisung ajak pei yari mapa inyaka alitsü putu ka tenzüktsü. Tanü putu nung yabo tangar shingaia asen dang tajung akümtsü mashiyonga asenoki angur aser angashir, anungji tajungpurtem jilu ajizüka tajung akümtsübaji asernok tsürabur aser lanurtem ajak teinyaktsü mapa asütsüla. Asenok ajak tangatetter aser nübortem tenzüknertem dang lir, anungji kechiba asen lima nung asenoki election timi magitettsü (?) ta senso ajaki asüngdanga telangzüba bushidi. Kechikoda election timi agir, iba amaji asenok madak yimsü asütsü asoshi asenoki tim nisung shimtettettsü.