Minister Imna Along-i Union Minister, Prakash Javedkar ajuru

Dimapur, Monupii/May 29 (TYO): Monupii/May 29, 2018 nü New Delhi nung Nagaland Minister Higher Education & Technical Education, Temjen Imna Along-i Union Minister, Ministry of Human Resource Development (MHRD), Prakash Javedkar pa indang office nung ajurua Nagaland nung Higher Education kübok institutions jenjang mejungi aliba indang metetdaktsüogo, ta PRO(IPR) Nagaland House New Delhi, Kuolie Mere-i sangdong ka nung metetdaktsü.
Temjen Imna Along-i tang aliba college temji New Model Degree colleges jenjangi ajungkettsü kanga nüngdak aser Nagaland nung professional college tem amenokba ajanga lanurtem nüngdak peritsütsü atema benoka jembi.
Iba dak sendakba nung Union Minister, Prakash Javedkar-i Nagaland aser North Eastern State tem nem maongka balaka agüja Higher Education kübok institutions nüngdak balalaji RUSA Phase 2 kübok züngoktsü nangzük.
Ajioda Union Minister-i Nagaland nung RUSA Phase 2 kübok New Model Degree College aser Professional College züngoktsü atema nangzükba atema Temjen Imna Along-i pa dang pelaba lemsatepogo, ta kasa sangdong ajanga metetdaktsü.