ECI-i Kubza PS 13 nung tanü re-poll asütsü tuyu

Kohima, Monupii (May) 29 (TYO): Mokokchung district kübok 26-Aonglenden constituency nung Assembly Polling Station No. 13-Kubza nung re-poll asütsü atema Election Commission of India (ECI)-i tetuyuba agütsüogo.
Iba polling station nung yashi vote agütsüba magitsü aser Rasemnü (Bodbar) anepdang 7:00 ako nungi nikongtsütsü 3:00 tsüngda re-poll asütsü ta ECI-i tetuyuba agütsü.
ECI Secretary Arvind Anand-i Chief Electoral Officer, Nagaland dangi züluba shidi ka nung, ken o benokba den kulitem nung ajemdaker Monupii (May) 28 nü polling station No. 13-Kubza nung vote agütsüba magitsü aser Monupii (May) 30 nü re-poll asütsü tetuyuba agütsür, ta shia lir.
Kubza PS No. 13 nung nisung telok kati polling booth telungi nungpoka atu aser EVM machine raksatsü. Iba tatalokba atema Deputy Commissioner-i re-poll asütsü junger ta ECI dangi aben. Iba tatalokba dak sendakba nung police-i nisung 7 pua lir.
Yashi nikongtsütsü 1:10 ako meta nisung 70-80 shi ka polling station-i aru aser ballot unit o control unit raksatsü, ajisüaka VVPAT nungbo teka mai.
“Iba polling station nung vote 85% shi agütsür liasü saka tatalokba sülen vote ka dang magütsüdaktsü” DC & ARO Mokokchung Sachin Jaiswal-i ECI dangi züluba shidi nung shia lir.
Kubza dak alia polling station 10 nung Presiding Officer temi Control Unit nungi mock poll mapang agütsüba votes magien liasü ta ECI-isa metetdaktsü.
Polling Station temji- 21-Tuli Assembly A/C nung PS Nos. 6 & 49, 39-Sanis A/C nung PS No 6, 19-Phek A/C nung PS No 21, 29-Jangpetkong A/C nung PS Nos 28 & 30, 26-Aonglenden A/C nung PS No. 36, 5- Ghaspani A/C nung PS 45, 49-Tamlu A/C nung PS 43 aser 37-Tyui A/C nung PS 50 lir.
Ajisüaka, mock poll agidang VVPAT Voter Slip tem agitetadoker asü nungji aser jungjunga special envelope ka nung sepbanga ayu nungji, item polling station tem nung re-poll asütsü nüngdak madoker kechiyong VVPAT slips ajanga vote shitak züngtettsü, ta ECI-isa ashi.
ECI-i item ama Polling Station tem nung vote azüngtsü atema inyakyim kar metetdaktsüogo. (a) Mock poll agidang amshiba VVPAT slips medeni polling agidang amshiba VVPAT slips ajanga votes azüngtsü. (b) Mapang kümzüktsü mechi, CU nung aliba votes ajak azüngtsü aser iba sülen mock poll agidang amshiba VVPAT slips zünger CU nung aliba votes nungi ibaji endoktsü.
NPF aser BJP teloktemi polling station 17 (Meluri nung 16 aser Kohima nung 1) nung re-poll asütsü takhangba agütsüba atema Deputy Commissioner aser Assistant Returning Officers den observer temi tanü ken o ajak jungjunga reprangdang aser re-poll masütsü telemtetba agi, ta Additional CEO N Moa Aier-ia metetdaktsü.
Monupii (May) 31, 2018 nü Nagaland kübok centre 13 nung votes azüngtsü. Centre temji- DC office Dimapur, Peren- Old DC office, Peren Town, Kohima- DC office, Pughoboto- DB’s Court, Phek- New DC Office, Mokokochung- Town Hall, Zunheboto- Town Hall, Wokha- Tiyi Hall, Tsumang colony, Mon- DC Office complex, Longleng- DC Office, Tuensang- CKS Hall, Tuensang, Kiphire- DC office aser office of Commissioner for counting of postal ballots lir.