Bank nung inyakertemi lungkak aitba ajanga Nagaland nunga timtem ajurur

Monupii (May) 30 nü bank nung mapa inyakertemi Kohima nung lungkak aitba angur.

Kohima, Monupii (May) 30 (TYO): United Forum of Bank Unions (UFBU) ketdangsüba kübok India ajungalen bank nung mapa inyakertemi ghonda 48 lungkak aitba ajanga Nagaland nunga bank maparen nung tetsükdaktsü ajuruogo.
Tanep SBI Kohima kongsang nung lungkak aitba shilem ka agidang bank nung mapa inyakertemi IBA-i takhangbatem magizükba, sorkari itssen meyipa mereprangshiba, IBA-i wage bill nung 2% ajungkettsü shidangba anema yimyimtem ayim.
Parnoki tekaratiba nung itasen reprangshitsüba onük angatetteptsü, tanga service conditions tajungba kümdaktsütsü aser scale VII tashi ketdangsertem dena itasen reprangshitsü atema takhangba agütsü.
Sorkari takhangbatem atema telangzüba magütsüra bank nung mapa inyakertemi mapa telatet makai lungkak aittsüsa akümtsü, ta State Bank of India Staff Association (SBISA) North East circle tatong tir A. Lolly Moses-i ashi.
“Sorkar aser IBA ajanga bank nung mapa inyakertemi anogo 2 lungkak aittsüsa akümer aser iba ya parnoki onok ajungmesoba dang lir” ta paisa ashi.
Bank nung mapa inyakertemi demonitisation, government insurance schemes, Mudra loans, Jan Dhan accounts, Aadhaar cards seeding amala mapatem kanga meranga inyaka arur. Ajisüaka, sorkari itasen 2% tutsütsü ta shia onok mezüngmeshir, ta Moses-isa shisem.
“Iba ama temenünütsü aketba telemtetba agiba aser bank nung mapa inyakertem mezüngmeshiba ya onoki aitsür” ta paisa metetdaktsü.
CPSEs indang itasen nung 15 nungi 20% tashi ajungkettsüogo, anungji sorkari tekaratiba nung bank nung mapa inyakertem indang itasen meyipa reprangshitsüla, ta SBISA North East circle tatong tirisa ashi.
Lungkak aitba sentong akangakanga agiba ajanga dang sorkar aser IBA-i asenoki ashiba angatsü ta paisa bank nung mapa inyakertem dang longjemer külemi ola adoktsü ayongzük.
“IBA-i bank nung mapa inyakertem asoshi tajung mebilembaji magizüker. Anogo ananü lungkak aitba ajanga IBA nungi telangzüba tajung mongura, onoki maneni lungkak aittsü” ta paisa nenshia metetdaktsü.
Bank nung mapa inyakertemi tanü nungi tenzüker ghonda 48 atema lungkak aitba sentong ya asüng tembangtsü.