Lok Sabha by-election nung shilem agir ajak dang pelar: NDPP

Dimapur, Monupii (May) 30 (TYO): Nagaland nung alirtemi tangatetba tajung nung Lok Sabha constituency indang by-election nung shilem agiba atema NDPP-i pelaba metetdaktsü.
Vote agütsürtem shilem aika asüba ajanga nübortemi democracy nung tamang akar ta asüba kuli sayur aser state-i linük tashi aittsü atema inyakba nung shilem agir, ta NDPP Media & Communication Committee sangdong ka nung metetdaktsü.
By-election nung shir adokdir adokaka election tiptema agiba atema NDPP-i nübortem nem tenüngsang agütsür, ta parnokisa shisem.
NDPP-i kanga dang tebilemtsü bena, shisa kaa aser mangdang aliba nüboyimba sentong ka agi aser iba ajanga nübortem ajak longjemtsü alizüng liasü. NDPP den PDA teloktep nung adenba teloktemi lennirtem indang mangdangtem, sorkar indang terenlok tebilemba aser yimjung o telongjem indang osangtem metetdakja liasü, ta sangdong nungsa shia lir.
Onok den toktepertemi kin aser tamangba nung ajemdaker mapa inyak aser iba ya tesüiba mapang Nagaland nung mongudang liasü. Ajisüaka, PDA-i osangkaket nung raratsü memulung saka Nagaland tasen ka yangertsü atema nükjidong nung dang rangloker nüboyimba mapa inyak, ta NDPP-isa metetdaktsü.
Election Commission of India aser State Election Department den sorkar ketdangsertemi election tiptema agidaktsüba atema pelar. Maneni onoki Arogotem, kin hoho tem, civil society aser NGO tem dang pelaba shisemer, ta ta NDPP Media & Communication Committee-isa ashi.
NDPP-isa PDA teloktem nung adenertem ajak dang pelar aser asenok külemi longjemer inyakba ajanga asenoki nübortem tenzüktsü atema tanaben bendanga agütsüshitsü ayongzüker, ta parnokisa shisem.