Dimapur nung No Tobacco Day ayonga among

Dimapur, Monupii/May 31 (TYO): Tanü World No Tobacco Day 2018 anogomong nung Trailblazers Society-i Maple Tree School, Dimapur aser Nagaland Police Central School, Chumukedima na nung awareness sentong ayongzüka mongogo.
Dentist, Dental Touch & Facial Aesthetics & Trailblazers Society Chairman, Dr. Temjennungsang Longchari-i kaketshirtem aser tesayurtem dang moko achiba ajanga takoksa balala anguba indang lemsatepa liasü. “Moko ya talisa mazüng-mashirtemi achir. Temejakba moko Gutkha nung ‘nicotine’ lir aser ibaji achiba ajanga yimya sübadaktsür. Moko nung aliba magnesium carbonates agi temelungjang yirutsür aser cancer adokdaktsür. Moko ajanga kaketshirtem tangazükba shisatsü nung mejungi kongshir, class takdang nung nendaka mangazükteter, moko achiba ajanga shiranga class nung medenteter aser saisapong nunga kongshir,” ta pai metetdaktsü.
Paisa power point ajanga asen lima nung atalokbatem nung ajemdaker moko achiba ajanga takoksa balala anguba indang lemsatep.
Sentong nungsa kaketshirtemi moko machitsü atema tenangzükba agia liasü.
Moko achiba ajanga temang nung takoksa anguba metetdaktsütsü aser sorkartem dang moko achiba ajema akumtsü atema mapatong balala benoka inyakdaktsütsü ajungshitsü nükjidong nung 1987 küm nungi tenzüka World Health Organization (WHO)-i sponsor süa küm shia World No Tobacco Day amonger.
WHO-i ashiba agi, küm shia moko achiba ajanga alima nung nisung million 7 dak tema asür, aser moko anema mapatong balala meinyakra iba dang nungjagi ano timba akumtsü.
Taküm küm atema World No Tobacco Day omenji “Tobacco & heart disease” liasü.