PWD Minister-i Longleng semdang

Kohima, Monupii/May 31 (TYO): Tanü Nagaland Public Works Department Minister, Tongpang Ozüküm-i Longleng Headquarters semdanga tang teinyakdak mapatem reprangdangogo.
Minister den Executive Engineer Longleng, Junior Engineer Housing & Mechanical Longleng, DC, ADC aser Public o sorkar ketdangsertema liasü.
Minister tonga arudang Executive Engineer S.B. Angh aser pa den inyakertemi pa agizükba sülen parnoki tetsüng agi tang teyangludak district headquarter lenmang sema jaja.
Minister-i semdangba dak sendakba nung Executive Engineer, S.B. Angh-i, iba ya district atema temoatsü ka lir, kechiyong küm ter tsüngda tang mezüng PWD minister-i dept. aser district nüburtem nüngdak balala reprangtsü atema semdangogo, ta metetdaktsü.
Angh-i, Longleng division nung tongtibang lenmang 12 shi lir aser iba nungjagi tanü tongtibang lenmang asem nüburtem asoshi yanglutsütsü shimogo, ta metetdaktsü.
Item lenmang asemji- jila nung tongti lenmang (kilometer 2.2), Medical Road (1.3 km) aser DC Bungalow leni aoba lenmang (1.8 kms) tem lir.
Paisa, sorkari Longleng division atema sen crore 1 shi lemzüktsü, iba nungjagi kilometer 1.3 blacktopping (feet 20) lenmang renemogo aser tanüngbaji tekaraba nung renemtsü imlar, ta metetdaktsü.
Item mapa rongnung tesem balala nung CC drainage aser culverts yanglushiba densema lir.
Angh-isa, senotsü peria melemzüktsüaka department-i inyakba mapa agi Minister melung süogo aser nüngdak dang süra district nem ano senotsü tali lemzüktsütsü ta Minister-i nangzükogo, ta metetdaktsü.
Lenmang sema senzüba sülen Minister-i Dept. aser District Administration, Phom Peoples’ Council densema melungtet teloktem, Phom Students’ Conference aser District nung Public lenirtem den senden ka mena liasü.
Senden nung Longleng DC-i sensotem tenüng nung Minister-i district asoshi terenlok mapa inyaktsüba atema pelaba metetdaktsü.
Senden nungsa Phom Peoples’ Council (PPC)-i Minister nem temepishiba onük asem agütsü, item rongnung- Tamlu nung SDO PWD (R&B) amenoktsü, Tuensang Sub-Division kübok JE PWD (Housing), SDO PWD (Housing) Longleng jenjangi ajungkettsü aser Mokokchung Division kübok JE PWD (Mechanical), SDO PWD (Mechanical) Longleng jenjangi ajungkettsü densema lir.
Phom Students’ Conference-ia Roads & Bridges Minister, Vikheho Swu mapang nung Longleng-Pongo lenmang project atema sen lakh 50 agutsütsü nangzükba nungi tanüngba senotsüji agutsütsü mepishi. Parnokisa, iba mapa atema Department-i sen lakh 28 lemzüktsüogo aser tanüngvba sen lakh 22 ano magütsü, ta metetdaktsü.
Iba project ji tang teinyakdak Minister kübok mali, ajisüaka Phom Students’ Conference-i Minister Tongpang dang tim ketdangsertem den iba atemaji tekaraba nung jembitsü mepishi.
Lenmang yanglushiba dak sendakba nung Minister-i, tang inyakba projects ya tongtibangsüa jilatem nung gari lenmang nung ongken yanglushitsü atema lir, ajisüaka ongken yanglushiba dak alia department-i districts headquarters ajak nung ‘premix bituminous’ yoktsü meranger, ta metetdaktsü.