Assam tzümetsüng agi nisung 3 süogo, nisung million 1.4 tangshia lir

Guwahati, September 03, (Agencies): Assam nung tzünglu maneni kanga sashia aluba ajanga Brihostibarnü ano nisung asem süogo aser state nung nisung million 1.4 shi tzümetsüng agi timtemer.
Assam State Disaster Management Authority (ASDMA)-i, “Brihostibar nü state nung tzümetsüng kanga sashia adokba ajanga Tinsukia district nung nisung ana aser Dibrugarh district nungi nisung ka ta par asem süogo,” ta sangdong ka ajanga metetdaktsü.
Assam nung tang district 19 kübok yimtsüng 2199 nungi nisung 13,78,540 shi tzümetsüng tasen agi kongshia lir.
Lower Assam Barpeta district kija nung tzümetsüng agi nisung 2,19,250 amshia lir, iba den külemi Dhemaji nung 1,50,141, Darrang nung 1,43076, Dibrugarh nung 1,37,390, Nalbari nung 1,28,499 aser Sonitpur district nung 1,26,535.
Dhemaji, Kokrajhar, Bongaigaon, Sonitpur, Barpeta, Goalpara, Morigaon, Cachar, Lakhimpur, Jorhat, Tinsukia, Darrang, Baska, Nalbari, kamrup, Dibrugarh, Sivsagar, Golaghat aser Nagaon district tem nung tsünütsü aliba ali tasazük hectare 1,76,559 dak tema tzü agi metsüngbanga lir.
District ketdangsertemi tejenokdak tesem 385 yanglua lir aser item nung nisung 2,66,908 jenoka lir.
Kaziranga National Park nunga forest camp 67 tashi tzü agi atsüngbanga lir.
“Arem shirurutem kümzüktsü, talisa tezü ka aliba kendok kümzüka ayutsü asoshi onoki maparen ajak tenzükogo,” ta Kaziranga National Park nung ketdangser kati metetdaktsüogo.