Pai Sang Raksatsü – T.Ken 124:1-8

“Tsüngrem asenok asoshi lira, shibai asenok anema arutsü” ta Pauli Rom 8:31 nung asüngdanger, aser asenoki telangzübaji metet. Tsüngrem asenok asoshi lira shingai asenok anema arutsü makok. Ibaji T.ken 124 omenji lir. “Kibuba shiba asen tsütsü liasü Pa ka masü asübo. Kodang nisungtemi asen anema apuso: Kodang parnoki asenok anema ain adok: idangto parnoki asenok taküm meyoker lila” (t.2,3).
Kechiaser Tsüngrem asen tsütsü ali nung, nisungi asenok chimatsü makok. Ken züluri pa tsükchirtem molusongzü aser shirem den medemdanga jembi, shibai pa dang punglok aser chima. Asenok chinüba nüburtema lir. Kodang nisungtemi na tembangdaktsütsü merangdir, Tsüngremi parnok anendaktsütsü ta bilemtetang.
Saka nisungi na mechitsü. Tiai na mapanger. “Idangto tzütemi asenok mobanger lila, asen taküm madak ayong yima orr lila. Idangto tzü tesashi asen madak orr lila” (t.4,5). Tzütem asen tanela madak yima aodang asen taküm arakseter ama bilemer. Saka Tsüngrem asenok tsütsü ali nung tiai asenok memobangtsü.
Ken züluri tia agi chimaba aser araksetba noksaji melenshia sang nungi jenbu ta zülu. “Ozü kümertem sang nungi ozü ka ama, aser asenok jentetta lir” (t.7). Tsüngremi asenok araksetba aser chimaba nungi dang kümzüker. Pai asenok techiokdang chioker masü saka satan sang raksatsür. Asenoki Kibubai aniba nung anidak tashi Satani asenok tanaben aputsü makok.
Takümi na techimadaktsü. Takümi na teraksadaktsü. Satani na tanaben tepudaktsü. Tsüngrem ne den lira shibai na anema arutsü ?
Nai tebilemtsü ajurudang Tsüngrem ne den lir ta tamadok. Tsüngrem ochi tenangzüba ne den lir. Tsüngrem dak amangang. Pai na kümzüktsü.