Nipah tashidak tanaben poktetsüa akok

Kazikode (Kerala), Aami/June 01 (Agencies): Tesüiba anogo ana tsüngda Kerala kübok Kazikode district nung ano nisung ana süogo, aser ibaji densemabo state nung Nipah virus agi asür ajak agi nisung 16 jungogo, ta tanü state Health Minister, K.K. Shailaja-i metetdaktsü.
Minister-isa, ano iba tashidak wara ya tanaben poktettsüa akok, ta metetdaktsüogo.
Iba tashidak menaa alirtem tang tanepdak lir anungji maneni kümdanga alitsüla, ta Shailaja-i sangdong ka ajanga metetdaktsü.
“Iba tashidak tanaben poktettsüa akok ta onoki asadangtetogo aser tesem tamajungtibaji iba tashidak menaa alirtem aliba tesemtem asütsü. Item nisungtemji onoki junga reprangdar. Tendangba ajangasa mapang tetemsü nung Nipah virus temaitsütemji temai adoktsü, anungji tamalen iba tashidak menaa alirtemi Kozhikode nung amenoka aliba special control room den tongtepratepa alitsüla,” ta lai metetdaktsü.
Shailaja-i ashiba agi, tang tashi nung Nipah tashidak positive puteta alir parnok 18 rongnungi parnok 16 bo süogo saka tanüngba nisung anajibo tajungba kümdar.
Yangtepnüa (Brihostibar) iba tashidak agi nisung ana asüba sülen sorkari tekümdangtsü osang maneni metetdaktsür.
Tanüngba nisung anaji Kazikode anasa Balussery nung aliba sorkari mozükidang anepaludar.
Tanü iba hospital nung inyaker doctor trokprongla den tanga medical professionals nem sodi agüja parnok dang anisüngzüktsü tuyua liasü.
Iba district nungi State Transport Minister, A.K. Saseendran-i, iba tashidak azüokteta liaka maneni kanga kümdanga alitsüla, iba denji külemi nüburtemi amalitepa alitsüla, ta ashi.
State nung iba tashidak poktetba ajanga Public Service Commission-i Aami (June) 16 tashi tatidang ajak thinentsüogo.