Manipur Congress-i Naga agreement & citizenship bill anema noktaker

Imphal, Aami (June) 1 (Agencies): Manipur nung opposition Congress-i Rasemnü (Bodbar) NSCN (IM) aser India sorkar tsüngda framework agreement yangluba aser Citizenship (Amendment) Bill 2016 anema lungkak aitba sentong ka agi.
Manipur Pradesh Congress Committee (MPCC)-i iba sentongji Imphal nung aliba Congress Bhavan nung ayonga agi aser taoba Chief Minister O Ibobi Singh, MLA & taoba Deputy Chief Minister Gaikhangam, MPCC President T N Haokip den taoba aser tang teinyakdak MLA tem aser party züngsem aika aden.
Sentong nung jembirtem ajaki NSCN (IM) aser India sorkar tsüngda framework agreement aser Citizenship (Amendment) Bill 2016 anema jembia liasü.
Sentong nung adenertemi bangzüng trok renem aser bangzüngtem rongnung NSCN (IM) aser India sorkar tsüngda framework agreement atema November 21, 2017 Memorandum agütsüba nung masetshii noktaktsü ta asüba dena lir.
Iba Memorandum nung Manipur litsü, ketdangsübaren, senotsü, sobaliba aser yimtenren onüktem dena lir.
NSCN-IM den Centre atema interlocutor RN Ravi-i April 26, 2018 nü framework agreement dak sendakba jembiba aitsür, ta sentong nung adenertemisa bangzünga renem.
Parnokisa Centre sorkar aser yimtenren telok ajaki Manipur state kümzüka ayutsü atema tayongzükba agütsütsü lemtet.
Iba sentong nung adenertemi Joint Parliamentary Committee (JPC) dang Citizenship (Amendment) Bill, 2016 meyipa agitsü atema memorandum ka agütsütsü lemtet.
Prime Minister aser Union Home Minister nem memorandum ji agütsütsü aser MPCC-isa Centre dang Citizenship (Amendment) Bill, 2016 meyipa agitsü atema takhangba agütsü.
Centre aser NSCN (IM) tsüngda framework agreement aser Citizenship (Amendment) Bill atema BJP-i ola madokba atema jembidang taoba Chief Minister Ibobi-i “BJP miim tebilemba ajanga tenem aser lenden nung alirtem tsüngda mepetmesü tali adokdaktsüogo” ta ashi.
Kodangsa Centre nung BJP sorkar arudir, Manipur nung iba ama mepetmesü adokdaktsür. Küm aika telemtetba monguteti aruba Naga tebilemtsü latetra pela agizüktsü. Ajisüaka, Centre nung BJP sorkari state tem dang asüngdangya masüba yimya ka lir” ta paisa ashi.
“Kin ka peladaktsütsü atema kin telemsa yur autonomous council tentetra, ibaji state (Manipur) nung telemsa adoktsü atema metsü proker asütsü. Manipur ama state tila ka iba ama tenangzüktep ajanga telemsa adokra, Manipur nung alirtem BJP nem kodanga tatok magütsütsü” ta Ibobi Singh-isa shisem.
Taoba deputy chief minister & Congress lennir Gaikhangam-ia ashiba agi, “Nübortemi framework agreement atema tasüngdangbatem asoshi BJP-i telangzüba agütsütsüla.”