Spain lenir Rajoy-i tamakok angu; Sanchez PM akümtsü

Madrid, Aami 01 (Agencies) : Tanü Rogonü parliament nung vote agütsütepa Mariano Rajoy-i aniba Conservative sorkari tamakok anguba sülen Socialist party lennir, Pedro Sanchez Spain nung Ato Kilonser tasenba akümtsü renemshidagi.
Spain nunger loktilibaren nung koba tebilemtsü agi neneta lir, ibaji reprangtsütsü, ta aruya aliba lennir tasenbai nangzüka metetdaktsüogo.
Sanchez shiba tang tashi opposition party tulutiba nung lennir lir, pai asüng Küptoknü tashi nung Spain Chuba Felipe VI akhüm nung tenangzükba agitsü aser aruya aliba anogo eshika tsüngda pa den inyaktsüpur Cabinet kilonsertem shimtettsü.
European Union kübok tebilemtsü tulu agi neneter aliba mapang tongtibangsa EU nungi United Kingdom pakzüka aotsü aliba aserbo North Africa nungi nüburtem aika senoka aruba ajanga yimtenren tsütsü tebilemtsü agi sünger aliba mapang ka nung, tang arishi küm 46 tain Sanchez-i eurozone kübok rongsenren tsütsü tashi tulutiba aliba linük pezübuba yimsü asütsü tenzüker.
Sanchez-i takok anguba sülen Madrid stock exchange noklang nung shilem 1.8 agi ajungketba osang angashia pai aniba party nungi tatartemi nokdaker pa nem akhümtsübu agütsü.
Rajoy shibai Spain ato kilonser ka ama küm trok tema linük yimsü süa aruogo, pa ya küm 40 tsüngda lennir ka teinyakdak mapang parliament ajanga anentsür rongnung mezüngbuba asütsü.
Vote agütsüba result osang sangdongba sülen Rajoy-ji Sanchez tonga oagi pa den salem, ta kasa osang ajanga metetdaktsü.