Watsü Mungdang-i Thanwalo Magh aitsür

Dimapur, September 3 (TYO) : August 22 nü Tesophenyu yimer Thanwalo Magh-i tesempatsü mapa inyakba kukua aitsür ta Watsü Mungdang-i tanü sangdong ka ajanga metetdaktsü.
Arishi küm 60 tain tantsür ka tashiyim agi raksatsürji ozüng tesashitiba agi merenshitsüla ta Watsü Mungdang-isa takhangba agütsüogo.
Ozüng amertemi Thanwalo Magh tepuokdak nungi mechioktsüla aser iba ken o nung okatsürtemi aibelensang pusema meyariteptsü akhanger, ta Watsü Mungdang tir, Moachila aser tongti tezülur, Toshimenla Walling nati sangdong nung shia lir.
Tetsür dak ozüng alema mapa inyakba aser tashiyim agi raksatsüba inyakyimtem anema noktakba teloktem den Watsü Mungdang-i pusema noktaker, ta Watsü mendenpurtemisa ashi.
Tetsür tashiyim agi raksatsürtem merenshitsü atema state sorkari ozüng takang lattetsüla aser bail nung mechiokba den tasüba temerenshi jenjang den kasa asütsüla ta Watsü Mungdang-isa sangdong ajanga takhangba agütsüogo.