MTLT-i Mon nung tashiyim mapa aitsür

Dimapur, Aami (June) 1 (TYO): Mon jila nung tsümar kati tetsür tanur ka dak tashiyim agi shi medemba atema kanga aoksar aser jashir ta Mokokchung Town Lanur Telongjem (MTLT)-i metetdaktsü.
Rahul Sen-i arishi küm 13 tain tetsür tanur dak khen dang masü saka taoba mapanga anaben tashi tashiyim mapa inyakba aser la amokmerenbaji Naga nungeri süoki ia bilemtsüba onük ka lir, ta MTLT-i ashi.
Nagaland kübok tesem balala nung tebilemtsüba abenba aser akhümtsübuba non-local (India senso) tem aika lir, anungji item non-local temi lokti anema mapa inyakertem anientsü atema mepishir, ta parnokisa shisem.
Rahul Sen-i mapa inyakba khukhua aitsür aser pa ozüng tapet agi merenshitsü akhanger ta MTLT-isa metetdaktsü.
Tashiyim agi shi nung medemba ya Indian Penal Code nung Arrla 376 kübok ‘non-bailable offence’ ka lir aser iba atema taküm piyong tepuokdak ayutsü mesüra küm 7 bosa tepuokdak ayutsü lateta lir. Anungji, ozüng amertemi iba nung ajemdaker temeten agüjang ta MTLT-isa takhangba agütsü.
Maneni, Nagaland State Women Commission-ia iba tensa atema mapa inyaktsü aser tia maka ajuruba tanutsülai la taküm tiptema liyonga odaktsütsü atema sorkar schemes aser programmes ajanga teyari agütsütsü mepishir, ta MTLT-isa metetdaktsü.