FNR-i yimjung aser putepshitsü atema mepishir

Dimapur, Aami (June) 1 (TYO): Monupii (May) 31, 2018 nü Tirap District kübok Namsang aser Sipini yimtsüng tsüngda NSCN (IM) aser GPRN/NSCN khatepba atema kanga süoki ia bilemer ta Forum for Naga Reconciliation (FNR)-i metetdaktsü.
Iba tatalokba nung nisungtem taküm sama aser yiruba atema kanga jashir. Naga nunger külemi shisadangba mapang ka nung aser Naga nunger putepshitsü atema lenmang bushitepba mapang ka nung telungpur teloktem tsüngda khatepba ajanga tetsükdaktsü bentsür arur. Prangpong-injang amer rarabaji Covenant of Reconciliation den meputep, ta FNR sangdong ka nung ashi.
Iba tatalokba nung dena aliba telok anaprong nung tanishirtem dang tiyongtsüi aitsü aser raraba anentsü atema iba sangdong ajanga mepishir. Telok anaprongi aremzükteptsü aser olemtep ajanga angatetteptsü mepishir, ta FNR-isa ashi.
Iba ama mapang nung FNR-i Tirap, Changlang aser Longding district tem nung aliba Naga nungertem asoshi bilemtsür, ta parnokisa metetdaktsü.