NTC-i Citizenship (Amendment) Bill, 2016 magizüker

Dimapur, Aami (June) 1 (TYO): Lok Sabha nung Citizenship Act, 1955 yanglushitsü atema Citizenship (Amendment) Bill, 2016 benokba ya Nagaland State atema tebilemtsü ka lir, kechiyong iba Bill ya agizükra Afghanistan, Bangladesh aser Pakistan nungi arurtem nem senso agütsütsü.
Bendang linüktem nungi Hindu, Sikh, Buddhist, Jain, Parsi aser Christian nunger nem sensoji agütsütsü. Iba Bill ajanga tanga linüktem nungi item tamangba yimsü amangertem India-i arutsü aser senso akümtsü atema maongka agütsür. Iba Bill ya telok telemsa yur yanglunür aser Hindu nunger ajangzüktsü atema lir, ta Media Cell, Nagaland Tribes Council (NTC) sangdong nung metetdaktsü.
Tamangba yimsü nung ajemdaker senso agütsüba nung lendong keta lir aser ibaji India indang secular tangatetba anema lir. North-East nung ozüng alema arurtem tasüng lir aser parnok teimbaka Bangladesh nungi arurtem lir. Northeast nung bendangertem tebilemtsü ulura lir aser parnok nem senso agütsübaji North-East tarutsü yimten tia atema tetsükdaktsü asütsü. Parnok nem senso agütsüba ajanga lisopurtem, maitsü, sobaliba aser litsü atema timtem tulu ajurutsü, ta NTC-isa metetdaktsü.
Iba Bill ajanga Assam nung kanga kongshitsü kechiyong Assam nung Bangladesh nungi ozüng alema arur million 20 shi ka lir. Iba jagi Assam nung teloktem den tangatetba shitak aliba MLA temi party telemsa kecha melii ola adoker, kechiyong kishiji lapoktsüra Assam nung ali kiburtemi timtem tulu ajurutsü.
AASU ketdangsüba kübok Assam nung alirtemi Citizenship Bill anema lungkak aitbaji kanga shitak aser North-East India nung aliba lisopurtem ajaki pusema nungittsüla, ta NTC-isa ashi.
Assam ji asenok den kidanger tajung ka lir aser Nagaland-i aruba kishizüng ama lir. Asenoki Assam den arrtsüa lir aser arrtsü ajanga melamela senzüteter. Anungji, asenoki ozüng alema arurtem noktangtsü atema arrtsü meshibangtettsü. Bill ji agizükba sülen Assam nung bendangertem arua jenokdang Nagaland nunga kongshitsü, ta NTC-isa metetdaktsü.
Assam aser North-East state tem nung Bill anema noktakba nung Nagaland Tribes Council (NTC)-ia pusema nungiter aser India sorkar dang iba mapa meyipa reprangshitsü ayongzüker. Meghalaya sorkari Citizenship Amendments Bill, 2016 khenyongi magizüktsü ta lemtetba atema tenüngsang agütsür aser Nagaland state sorkaria kasa tangatetba nung iba Bill anema noktaktsü ayongzüker, ta NTC-isa metetdaktsü.