Temelenshi atema civil service ya maongka lir: Dr. Bhalla

Kohima, Aami/June 02 (TYO): IAS, IPS & Allied Services (2017 batch) aser NCS, NPS & Allied Services (2018 batch) induction sentong Aami/June 1, 2018 nü Multipurpose Hall, ATI, Kohima nung agiogo.
Iba sentong nung jembidang ATI Director General, Dr. D Bhalla IAS-i, “Temelenshiji kenüyongi mataloktsü saka tanemtanemi ataloktsü,” ta metetdaktsü.
Pai ashiba agi, tesem mashie nung grassroot level nungi administration-i tashi itta terenlok agutsütettsü.
Paisa, tesasatsükaji, Nagaland nung dang masü saka tanga state tem nunga local civil services training atema temelung magütsür, ta ashi.
Iba training nung tongtibang onük asemji shisatsü, skill aser value lir, aser item rongnung benshitsü tasaktibaji value system lir, ta pai metetdaktsü.
“Taküm alitsü atema inyakba dak alia Civil service ya tangar taküm nung temelenshi bener arutsütsü atema maongka ka lir,” ta pai ashi. “Tangar taküm nung temelenshi bener arutsütsü atema civil servants ajaki benshira pei mapa jangrabangraa inyaktsü,” ta paisa ashi.
Civil servant ajak asoshi tongtibang skill anaji angaba aser jembiba lir, ta shia pai trainers dang iba training course agiba mapang nung anogoshia minute pongubosa jembiba aser angaba (communication) nung indokang, ta ashi.
Lokti pelaa agizükba o jembidang Director ATI, R. Asenla Keitzar, IAS-i, taküm küm atema course ji hopta pezü alitsü aser iba nungji Custom, tradition, Culture, Folklore, Languages ama onüktem lir, ta metetdaktsü.
Laisa, iba sentong nung onüktem densemba nükjidongji nüngdakba osangtem, skills aser values angatetba ajanga peipei posting tesem nung tajungtiba agi tenzüktsü asoshi lir, ta metetdaktsü.
Laisa ajak dang ATI-i agütsüba facilities ajak tajungtiba nung agitsü metetdaktsüba den külemi ATI team-i nenok tajungtiba nung anepalutsü, ta ashi.
Iba sentong ya Additional Director (Admin) Kevekha Kevin Zehol, NCS leniba nung agi aser Additional Director (Trg.) L. Youdang Jamir-i tepela anküp o jembia liasü.
Sentong nungsa Probationers-i pei sasa tejak shiotep aser NCS Probationers-i ken ka aten.