MTLT-i SSA tesayurtem aser DoSE tsüngda tekong merangtepba atema mepelar

Dimapur, Aami (June) 2 (TYO): Nagaland SSA Teachers’ Association (NSSATA) aser Department of School Education, Nagaland tsüngda SSA tesayurtem onük kar atema tekong merangtepba angudang kanga jashir aser state sorkari tekaratiba nung iba onük angatettepdaktsütsü akhanger, ta Mokokchung Town Lanur Telongjem (MTLT)-i metetdaktsü.
Iba ajanga Nagaland nung kaketshirtem akoksar aser education jenjang tamajungba kümdaktsür. Mokokchung nung aser Nagaland ajungalen sorkar primary aser middle school tem nung class junga magiteti arur aser iba atema shisabulur, ta MTLT-i ashi.
Mezüng state assembly election maparen nung tesayur noklang aika election mapa lemzüktsü, tanabuba nung SSA teayurtemi pen-down strike agi aser class mokdang aser tang SSA tesayurtemi Phase III lungkak aittsü tenzükogo.
Sorkar school nung azünger kaketshirtem tang tashi first terminal examination magi lir aser iba asoshi state sorkar aser talisa Department of School Education (DoSE)-i kaketshir meyirjang aika tarutsü asoshi tetsükdaktsür bener arutsür, ta parnokisa ashi.
Nagaland nung kaketshir meyirjang aikati sorkar school tem dak dang teimla ayur. SSA (Centrally Sponsored Scheme) ajanga tesayur tajungtem shimba ajanga Mokokchung jila temeket nungbo education jenjang tajungba akümba ajiteter.
Tsüraburtemi education nung sen endok mesasai tanurtem züngdaktsüba mapang ka nung aser loktilibai tanur shia nem quality education agütsütsü atema ola adokba mapang ka nung DoSE nung lungkak aitba inyakyim ajanga kaketshirtem tarutsü raksatsür. Taküm academic session nung lesson tagitsü tim magiteti tembang nung DoSE-i iba tebilemtsüji abentsü asü koda ta MTLT-i asüngdanger.
DoSE nung kechi komala timtem lir’ar memetet saka department nung khuret aliba ajanga kaketshir meyirjang aika dak kongshir. Anungji state sorkari tekaratiba nung iba ken o angatetteptsü atema akhanger, ta MTLT-isa ashi.