Tawa-tanü Ao O renloka aoba nung o semlok tatsüka

– Rev. S. Temjen Longkumer, Chumukedima.

ASLB ajanga tawa-tanü Ao O tasen aika yangluteta aser bendenloka aoba angudang kanga pelar. Tongtibangsa lanur putu atema tanü tani-tebenglem mesasai inyakba asoshi tenüngsang agütsür. Ano maneni nendaka inyaktsü ajungshir.
Nisung shinga 100% tabensa mali ta asenoki metet. Anungji shir telok südir süaka, parnoki inyakbaji teti 100% shitakbo masütsü akok. Ao O nung ita 12 aser anogo 7 indang nüngja tasen agütsüba indang taoba mapang ocet züluri temetongshiba kar lemsatepogo, aji idaki melepshir.
Saka iba sülen Tir Yimyim adok June 1, 2018 nung adianu P. Renthy Jamir-i aika züluba nung ojang 2 (ana) agiteta iba nung O semlok kar shinür. Mezüngbuba, pai ashi, “Deobar nü” “Tekülem nü” ta masü “Barmung nü” ta jembi.
Ni tang joko arishi küm 90 atonger. Ni tanur asüdang 1940’s mapang ozü yimer (Longsa) tanur-tain ajaki Barmung indang jembiba ni angashia aliba bilemteter. Ni yamai jembia aliba angashi. Barmung nü shishilemba masür, Barmung nü aremi maor, Barmung nü mapa meinyaker. Kechiaser ibai temeshi anogo lir (Sunday).
Ao O nung Laishiba tamasa 1964 küm adok, iba nungji Amungnü ta meyipzüka lir. Kechiaser parnoki akhi tsürabur O tejen Barmungji memetet asü südi, aji asenoki maitsür. Ano asen Aor tanur-tain ajaki bulua jembibaji Deobar iba ojang ya lir. Saka ya tzümar O agi Ao O kümdakja jembir. Aji agi oda, oda Barmung ta asübaaoji samadaktsü südi. Anungji Laishiba revised asüdang Amung nü melena Barmung agi melen nung ajungtsü ta bilemer. Kechiaser ibai Ao o tejen (original-literal) lir.
Tanabuba ojang, ASLB-i February itaji Tsükla ta ajaba P.Renthy Jamir-i aji masü ta ashir, nia pa o denji atener. Tsükla tetezüji talem mesüra tatsük mapang. Aser aji küm tsüngda nung march ita nungi tenzüker. March nungi September tashi ashitsü agi tsükla mapang (tatsük aser talem). October nungi February tashi temekong, asükwa mapang. Temekong mapangji February ita nung tembanger, anungji iba ita dang tsükla ta ajabaji tapet o masü ama bilemer.
Ita aser anogo nüngja ya tang tamasa Ao Oshi nung benoker asü-nungji nübur ajaki Au ta shitettsüba mapangji atasatsü nüngdaker. Aritepa kaket nung adoker tesülen melenshitsübaji ajak asoshi timtem tulu asütsü akok.
Ajangshia aruba tatishitsü tila ka shinür, 1980’s mapang Aor rongnung ozülu (spelling) nung opangmapu tulu adok. Iba mapang Ao Literature komite koba dang AKKOR ta aja (tang ASLB agi melen). ABAM Litt. Secy. Ka ama nia AKKOR nungji ex officio ka ama liasü. Iba mapang Kohima nung Language Department nung aser Aor kari AKKOR den junga metetpela mesüi Ao tazüngtsü kaket aika menüng. Saka ozülu magizük (ajak reject asü). Idangji sorkar aser asen Aor telok anaprongla takoksa tulu angu, koba tesasatsüka liasü.