BJP-i Ram ashioktsü; 2019 elections nung takok mangutsü; Ayodhya putir

New Delhi Aami (June) 5 (Agencies): Bharatiya Janata Party (BJP)-i Ram tsüngrem ashioktsüogo ta Ram Janmabhoomi temple tongti putir Acharya S Das-i ashi.
BJP-i Ram tsüngrem tenüng amshia sorkar akümtsü tashi angu saka tang parnoki pa khenyonhi amadokogo, ta Das-i osangbener dang ashi.
“2019 Lok Sabha election nung takok ngunüra, BJP-i Ram Temple yangluba mapa tenzüktsüla, aji ta mesüra parnoki timtem ajurutsü” ta Acharya S Das-isa ashi.
BJP-i tangsa tang Ram temple yanglu metenzükra BJP anema mapa inyaktsü ta Chawani temple putir Mahant Paramhans Das-i ashiba sülen ghonda ishika dang lir Ram Janmabhoomi putiria kasa olen jembiogo.
“BJP-i 2019 küm sorkar akümtsü tashi aginüra, parnoki Ram temple yanglutsüla. Yamaji mesüra onoki parnok tamakok ngudaktsütsü atema sentong ka tenzüktsü” ta Mahant Paramhans Das-i ashi.
Union minister Mukhtar Abbas Naqvi-i 2019 Lok Sabha elections nung BJP atema Hindutva aser Ram Mandir tongtipang onüktem masü ta jembiba atema Mahant Paramhans-i pa aitsü.
BJP-i Lok Sabha election nung terenlok onük nung ajemdaker tokteptsü ta Naqvi-i ashi.
Yogi Adityanath-i Uttar Pradesh nung Chief Minister meinyakdang tenzükba Hindu Yuva Vahini ta ser lanur telokia Ram Mandir onük ya tongti mekümdaktsüra BJP den tesentaktep pilatsü ta amokmerenogo.
Ram Janmabhoomi-Babri Masjid ken o ya tang Supreme Court nung telemtetba magiteti yua lir.
Allahabad High Court-i civil suit pezü atema 2010 küm obendang agütsüba anema temepishiba ken o 13 tashi benoka lir aser itemji SC-i angadanga arur.
High court-i ashishitep aketba Ayodhya kimung asemsü lemdangtsü atema obendang agütsü saka iba anema temepishiba ken o temji benok.