Dimapur nung Mongmong benjung kanga longsoa mungogo

Dimapur, September 3 (TYO) : Brihostibarnü DDSC ground, Dimapur nung Sangtam nungertemi Mongmong benjung kanga longsoa mungogo.
Tanü benjungmung nung tongti tesemdangerji Nagaland Legislative Assembly Speaker, Chotisuh Sazo liasü aser pai Sangtam nunger den Mongmong salem lemsatep aser terenlok atema külemi longjemer inyaktsü ayongzük.
NSCN-IM aser India sorkar tsüngda Yimjung Tenangzüktep agiba atema jembidang Chotisuh-i ashiba agi, “Teti atema mesüra khen atema telemtetba agitsübaji Naga nunger ket nung lir. Naga nungertemi teti atema telemtetba ka aginüra, asenoki Naga nunger ajak atema bilemtsüla.”
Asenok Naga nungertemi tarutsü atema kechi inyaktsü ta bilema inyaksangshitsü mapang tongja tongogo, ta paisa ashi.
Ozüng alema arua alirtem indang onük jembidang NLA Speaker-i ashiba agi, Naga nunger dak mapa inyaktsü sobaliba maliba ajanga shishilembabaren nung ozüng alema arurtemi amokbanga lir.
Asenoki iba khuret ya süoki ia magira, kobi melii asen lima rongsenkettsüng nung timtem tulu ajurutsü, ta Chotisuh-isa ashi.
Otsüla-oboula nungertemibo mapa meranga inyak, shinga nema amokbanga meyudaktsü aser pei nüngdaktem pei sasa nguteta inyak saka tanü asen Naga nunger lokti nung tenla saruba aser tashiyim agi sen meshiba inyakyimtem ajanga taküm liyonga aoer, ta paisa shisem.
“Iba ya Naga nunger sobaliba masü aser tangar dak dang metaloker aliba yimya ya endoktsüla. Asenoki asen tetsü-tebou nunger yimyatsüya aser inyaksangshitem wazüka benshitsüla” ta Nagaland Speaker-isa ayongzük.
Iba benjungmung nung Nagaland chief minister TR Zeliang adentsüba liasü saka pa kanga dang tongtipang senden nung adentsü atema Delhi-i aoba ajanga medentet, ta Chotisuh-isa tanü metetdaktsü.
Tanü agiba sentong nungsa Power Minister, C. Kipili Sangtam aser Co-operation Advisor, Imtilemba Sangtam nati o jembi.
Sentong nung Tsithrongse yimtsüng nung Head G.B, Tsithrongse-i Mongmong benjung indang osang metetdaktsü aser Sangtam Peoples Forum Dimapur District tir, Er. Athriba-i tesentepertem pelaa agizük.
Sangtam Baptist Lithrong, sannüker Rev. Thridong-i temoatsü meshia sarasadem aser Sangtam Union Dimapur tir, Thsapongkyu Sangtam-i anküp tepela o jembi.
Sobaliba sentong nung tetushi süa jaokerji RD & REPA Minister, C.L. John liasü aser pai Nagaland sorkar tenüng nung sobaliba sentong lapoktsü.
Tanü Housing Parliamentary secretary Levi Rengma, Nagaland Bamboo Development Agency Advisor, Naiba Konyak aser New & Renewable Energy Parliamentary Secretary, Toyang Chang nungertemi Sangtam nunger den külemi Mongmong benjung amung.