Sorkari takhangba mataloktsü tashi longkak aittsü: NSSATA

Kohima, Aami/June 07 (TYO): NSSATA (Nagaland Sarva Shiksha Abhiyan Teachers’ Association)-i longkak aitba shilem tasembuba Aami/June 6, 2018 nü tenzüka liasü aser tang tashi longkak aitdar, ta tanü NSSATA Tir, Penthungo Y Yanthan aser tongti tezülur, Vinoka Sohe nati sangdong ka nung metetdaktsü.
Tanü tesayur 2000 dak tema Directorate of School Education nung adenshia mener democratic yimya nung longkak ait, aser iba mapang nung NSF Tir den külem tenzükertem, ENSF Tir den külem tenzükertem aser KVSU (Kohima Village Student’s Union) Tir den külem tenzükertemi tesayurtem semdanga jembiba den külemi parnoki Association aser züngsemtem nungiter, ta metetdakja liasü.
2010 aser 2013 nung SSA tesayur 2730 shi order ka ajanga appoint asü aser advertisement ka ajanga regular state employees ta sangdonga liasü, saka sorkari Aami 6, 2018 nü sangdongba amaji masü, ta NSSATA-i sangdong nung shia lir.
“Iba appointment order ajanga join asüba anogo nungi Scale Pay den danga allowances/rates densemtsüla, anungji onoki tim nung takhangba agütsür,” ta parnoki metetdaktsü.
“Ano RTI ajanga Rongjui/September 30, 2013 nü Department of School Education-i, post creation ji SSA-i masü saka Nagaland sorkar ajanga lir, anungji tesayurtemji regular basis nung shim aser parnok service ji SSA project den tezüngzüktep aika masü, koba ajanga onok regular employees kümtsür,” ta paronki metetdaktsü.
2016 küm Nagaland sorkar, Department of School Education-i tezüluba nung, “SSA tesayurtem itasenji Non-Plan kübok aitdaktsütsü aser mapang tetemsü nung inyaktsü,” ta nangzüka lir, iba denji külemi “mapang shidak nung itasen agütsütsü atema state sorkari nüngdakba mera ajak agia inyaktsü,” ta metetdakja liasü, ta sangdong nungsa shia lir.
“Mapang shia SSA tesayurtem dang aiben nangzükogo saka sorkari mera agia meinyaker aser itasen regular magütsür, iba denji külemi non-plan kübok tanga sorkar mapa inyakertemi salary aser allowances anguba ama tang tashi iba tajangzükji magutsür. Anungji sorkari onok takahangba mataloktsü tashi democtratic yimya nung ochi temeden bushitsüji onok temeden lir,” ta parnokisa metetdaktsü.