Pranab Mukherjee-i RSS inyakyim anema tasü itta jembiogo: P Chidambaram

Chennai/June 08 (Agencies): Taoba Tir, Pranab Mukherjee-i Nagpur nung aliba Rashtriya Swayamsevak Sangh (RSS) headquarters nung o jembiba sülen anogo ka lir tanü Congress lenir aser taoba mapang Union Finance Minister, P Chidambaram-i pa tenüngsanga jembiogo.
Tamil oshi nung twitter ajanga Chidambaram-i Mukherjee-i Congress party indang tangatetba tajungtem metetdaktsüba atema pelaba lemsatep. Paisa Mukherjee-i tasü itta RSS indang mapatong tamajungtem tuteta ashiba atema tenüngsang agutsü.
Mukherjee-i RSS headquarters semdangtsü lia Congress lenir aikati ibaji ashishia jembia liasü, ajisüaka Mukherjee-i tamangba yimsü tsüngda taremzüktep alitsü nüngdak, ta jembiba sülen aikati pa nem tenüngsang agutsüogo.
Mukherjee-i RSS dang India nung lokti temeyoktep aika aliba, taremzüktep aliba, tamangba yimsü sadoka amangtetbatem indang lepshia metetdaktsü.
Pranab-isa yimtenren nung ‘untouchability’ agientsü nüngdak ta jembia liasü. Taoba mapang BJP lenir LK Advani-ia 2014 küm kasa o jembia, yimtenren nung ‘untouchability’ ajanga democracy aser Parliament tashimeitdaktsür, ta jembia liasü.
Pranab-isa, “Anogoshia asenoki asen meketa rara balala angur. Asen tetsü tasoli-i yimjung, tesünep aser tepela akhanger,” ta metetdaktsü.
Mukherjee-isa, “Anogoshia nisung billion 1.3 (India nütsüng)-i oshi 122 den oshioben 1600 dak tema jembir, tamangba yimsü tongti 7 benshir, Aryans, Mongoloids aser Dravidians inyakyim ka nung alir, wako ka aser ‘Bhartiya’ maitsü ka dang aser tsükchir mali,” ta metetdaktsü.