India aser Myanmar nati tesendaktep aser arrtsü onük jembi

New Delhi, Aami/June 08 (Agencies): India aser Myanmar na tsüngda Foreign Office Consultations 17buba round nung linük ana tesendaktep, arrtsü, security aser defence onüktem nung o lemtepogo, ta External Affairs Ministry-i sangdong ka nung metetdaktsü.
Yashi Foreign Secretary, Vijay Gokhale leniba nung India ketdangsertem aser Permanent Secretary, Myanmar Ministry of Foreign Affairs, U Myint Thu leniba nung ketdangsertem senden amen.
“O lemtepba mapang nung linük anapronglai tesendaktep onük, temaba ketdangsertem tsüngda semdangtepba, security aser defence dak sendakba onüktem, arrtsü onük, shishilembaba, terenlok atema amalitepa inyakba, connectivity aser sobaliba onüktem nung o lemtepogo. Parnokisa sub-regional, regional aser alima tebilemtsü onüktem nung o lemtepogo,” ta External Affairs Ministry-isa metetdaktsü.
Taoba ita External Affairs Minister, Sushma Swaraj-i anogo ananü Myanmar semdanga liasü, aser iba mapang nung lai Myanmar Tir, U Win Myint, State Counsellor aser Minister for Foreign Affairs, Daw Aung San Suu Kyi na ajurua senden mena liasü.
Lai semdangba mapang nunga linük ana arrtsü dak sendakba onük, yimjung aser security, Rohingya nunger Rakhine State-i meyipa arutsü onük, Myanmar nung terenlok project balala nung India-i yariba densema linük ana külem onüktem nung o lemtepa liasü.