JMC mezüng batch graduate asürtem nem tetushi agütsü

Mokokchung, Aami/June 8 (TYO): Mokokchung nung aliba Jubilee Memorial College (JMC) pur mezüng batch B.A graduate asürtem nem tetushi agütsüba sentong tajung ka JMC nung meraketa agiogo.
Iba sentong ya Mokokchung Town Baptist Arogo (MTBA)-i ayongzüka katsü.
Jubilee Memorial College (JMC) ya 2015 küm tenzüka liasü aser iba college nungi mezüng batch tetsür 10 aser tebur 12, parnok ajak senteper nisung 22-i B.A degree nguogo.
Osang tajung kaji; item kaketshir 22 rongnung Akümsünep Longchar-i Nagaland University kübok state level Economics subject nung tematiba jenjang nung takok angu. Akümsünep Longchar ya Meküli nunger Mayangneken aser Merentola na jabaso lir.
Tanü iba sentong nung MTBA Pastor Rev. Ponen Longchar, Dr. Chuba deacon aser Rev. Nungshi deacon parnoki Arogo tenüng nung takok angur kaketshirtem den tesayurtem aser JMC Board pur ajak nem tapet tenüngsang aser tetushi agütsüba o balala lemsatepa liasü.
Akümsünep Longchar-i takok tulu nguteta JMC nem tenüng tajung bener arutsüba nüngtem nung Arogo-i tepela temaitsü sayua pa nem senpet nüngo kaket ka den senotsü dena agütsüogo.
Iba dak alia Economics subject sayurtem aser JMC Principal nema kasa tetushi agüja senpettsü.
Takok angur tenüng nung Akümsünep-i mapang tatsüka agia tepela o kar lemsatep. Iba sentong MTBA Associate Pastor, Bendangwati Jamir den temoatsü meshia sarasademer tenzük aser JMC counsellor Moarenla den tenüngsang agüja sarasademer tembang.
JMC ya 2015 küm tenzük aser iba college nung Arts stream dang amenoka lir. Iba college nung Economics, History, Political Science, Sociology aser English subject-tem sayur aser subject ajak nung major agitettsü akok. Iba college ya tarutsü nung campus mesema stream balala lapokyonga aotsü nükla yur Longkhum lushi nung ali kimung tuluka mekazüka yua lir aser iba dak sendakba nung arogoi maparen balala inyaka odar.