Sorkar aser SSA tesayurtem tsüngda tekong merangtepba manener; Sorkari takhangba agizüker ta ashir; NSSATA-i tezüluba kuli meshir

Kohima, Aami (June) 8 (TYO): Nagaland sorkar aser SSA tesayur 2730 tsüngda tekong merangtepba manener aser iba ajanga sorkar primary school kaketshirtem ita ka dak tema timtem ajurua arur.
Nagaland Sarva Shiksha Abhiyan Teachers Association (NSSATA)-i tanü agi anogo asemnübuba lungkak aitogo. Parnoki tang agi lungkak aitba shilem tasembuba shilem agir.
Monupii (May) 2 anogo nungi lungkak ait tenzükba sülen NSSATA-i sorkar tongti ketdangsertem den-a ajurutepa senden aiben menogo saka parnoki telemtetba ka magitet aser lungkak aitba shilem tasembuba agir.
NSSATA-i taküm Aenjeti (January) ita nungi itasen magütsüi aliba agüjang ta akhangba ama DoSE-i tesayurtem indang bank account tem nung ita asem sen enoktsüogo. NSSATA-i lungkak aitba shilem tasembuba tenzükba sülen ang DoSE-i iba mapa inyak.
“Sorkari onoki akhangba onük ana atema telangzüba magütsü lir aser iba jagi onoki ita asem indang itasen agitsü memulungi liasü” ta tanü SSA tesayur kati ashi.
Tanüngba onük anaji- state sorkar mapa inyakertem ama 7th RoP nung SSA tesayurtem nem-a itasen agütsütsüba aser parnok indang itasen plan nung non-plan fund kübok agütsütsüba lir.
Tanü Chief Secretary Temjen Toy-i State Secretariat nung osangbener den jembidang, “department-i ita asem indang itasen agütsüogo aser sorkari 7th RoP nung parnok züngsemtsü atema mulunga agizükogo aser iba atema mapa inyakdar” ta ashi.
SSA tesayurtem indang itasen non-plan nung benoktsüba akhangbaji magizüker. Parnoki iba onük atema sorkar nem tetuyuba agütsütsü nüngdak madoker. Parnoki sorkar dang plan nungi non-plan kübok itasen agüjang ta tuyubaji kanga dang shisa makaba inyakyim ka lir, ta Chief Secretary-i ashi.
SSA tesayurtem ya flagship programme kübok shimer aser parnok Centrally Sponsored Scheme (CSS) telatetbatem agi alenbanga lir. Scheme tembangba sülen parnok indang mapa tembangtsü, ta paisa ashi.
2010 aser 2013 batch SSA tesayurtem nem DoSE-i regular state sorkar mapa inyakertem ama appointment orders agütsüogo aser iba atema Department-i RTI reply nunga shiogo. Iba inyakyim ya metongi inyakba lir aser reprangshitsü nüngdaker, ta Temjen Toy-isa metetdaktsü.
School Education Department aser Finance Department-i iba atema telemtetba ka agitsü merangdar aser lemtettsü. Sorkari tesayurtem akoksatsüsa telemtetba magitsü saka sorkar nem mapang peria agütsütsüla, ta paisa ashi.
Mapang tapet ka nung sorkar ka kümteta lir aser sorkari wadang balala nung khurettem koktettsü atema inyaker. Sorkari education aser talisa SSA onük atema süoki ia mapa inyaker, ajisüaka kounung nung dangbo temelenshi mongutettsü, ta Chief Secretary-isa shisem.
Lungkak aitba tesayurtemi kaketshirtem asoshi tebilemtsü angatettsüla aser asenoki kaketshirtem indang tarutsü meraksatsütsüla. Lungkak aityonga sorkari iba dang nungi talila meinyaktettsü, onoki nangzükogo aser iba nungji tembangtsü, ta Chief Secretary-isa ashi.
Education Department Principal Secretary, Menukhol John-ia ashiba agi, department-i akokba tashi iba tebilemtsü koktettsü atema inyakdar, ajisüaka SSA tesayurtemi temulung melemtetba ajanga lungkak aiter.
“Tangutsü tim akhangba atema onoki inyaktsü. Sorkari iba tebilemtsü mezüdok saka khuret koktettsü atema kanga meranga inyaker” ta paisa ashi.
NSSATA ketdangpurtemia osangbener den jembidang ashiba agi, Department aser Association tsüngda aiben sendentem amen saka sorkari tezükuba nung menangzükba ajanga telemtetba magiteti lir.
Sorkari parnok regular state employees ama shimok anungji tanga sorkar mapa inyakertem ama züngoktsüla, ta NSSATA ketdangpurtemisa ashi.
“Mapa küma inyaktsü atema mapang agitsü ta onoki meteta lir saka sorkar mesüra department-i tezüluba nung tenangzükba magütsüteter, anungji onoki Hombarnü adenshitsü aser maneni lungkak aittsü” ta parnokisa shisem.