Delhi nung asürtem rongnung Rajesh Bharti densema lir

New Delhi, Aami/June 09 (Agencies): Tanü Chattarpur nung police den raradang ozüng alema inyaker, Rajesh Bharti den pa den külemi inyaker nisung asem tepsetogo, ta police-i metetdaktsü.
Kasa rara nung police trok yiruogo. Tesüiba ita ana-asem shi Special Cell züngsemtemi Chattarpur nung aliba farmhouse nung tenük yoka liasü, kechiyong parnoki melung malemertemji iba tesem jagi arutsü ta lazüka liasü.
Police-i parnok dang parnok matsüngdangi arutsü atema asüngdang, ajisüaka parnoki police dak injang khaloktsüba ajanga parnok tsüngda rara adoka liasü.
DCP Special Cell, Sanjeev Yadav-i, “Iba rara nung police trok injang agi yiru aser kasa rara nung ozüng alema inyaker parnok pezü khaset aser pongububaji yirutsü,” ta metetdaktsü. Asürtemji Rajesh Bharti, Kapil, Sanjeet Vindro aser Umesh Don nunger lir ta jangjaogo, ta police-i metetdaktsü.
DCP-isa, “Ozüng alema inyaker, Rajesh Bharti aser pa den inyakertemji akhidang Haryana Jail nungi jena liasü. Ozüng alema inyakba ken o aika nung parnok tebushidak liasü,” ta metetdaktsü.