Teshisadang liang

Asenok dak aliba tekolok aser temulungjang nung ya tashi tuluka lir. Iba tekolok aser temulungjang
amshia asenoki tajung o tamajung na bendangtettsü. Aji oda, asen dak aliba kolok aser temulungjang ajunga agi Tsüngremi mulungba mapa inyaktsüsa renemtsübaji asenok nisungtem atema kanga tongtibang lir. Asenok mulung nung Laishiba tekong aika rizünga yur anogo shia iba jagi asen taküm len anidaktsütsü akok. Aji oda, asen kolok agi Tsüngremi yanglubatem kechisarina indang shisadanga Pa tashi aser taochi angatettsü merangba mapatemji asenok atema jangratemtsü mapatem lir. Atangji, asen taküm aser kibong raksatsü aser yanglutsübajia aseni asen kolok aser asen mulungjang nung renemba dak keta lir. Asenoki asen kolok aser temulungjangji tamajung mapa inyaktsü indang bilema renemra asenoki mapa tamajung inyaktsü, anungji asenokji nisung tamajung asütsü. Aji oda, asenok ya akhidang Tsüngrem memetetba mapang jabujaria aliba taküm aser kibong ama mesüi , Tsüngrem den tashi angaa jajaba takümtem asütsü asoshi ” asenok temulungjang aser tekolok jungjunga renemshir, shisadanga Yisu Khrista dak dang teimla yur akangakanga amanga liang,” ta 1 Peter 1 : 13 nung shia lir. Iba Laishiba tekong nung asenok dang temulung nangri akangtsü ashiba tetetzüji asenok temulungjang renemtsüba indang ashir, aser maparen ajak nung teshisadang alitsü ajungshir. Asen nem tekolok aser temulungjang agütsübaji bilemdanger tajungba jembitsü aser inyaktsü asoshi agütsüba lir. Ajisüaka, asenoki aiben asen taküm aser kibong nung Tsüngrem taochi indang mebilemdangi mashi mashi jembir aser inyaker. Idangji, asenoki Tsüngrem dang masü saka asen adianu aser medemertem jashidaktsür. Aji oda, asenoki aiben tanur ama meshisadangi inyakba ajanga asenok taküm nükjidonga matonger. Ibayongji, tenyar Pauli tamangertem dang joko tanur asüba mapang bilemba aser inyakba amato masü, saka tain amato shisadangtsü aser inyaktsü 1 Korint 13:11 nung ajungshir. Aji oda, tenyar Pauli tamangertem dang , temulung nung tanur tesü saka tebilemdangba nung tain süang ta Korint 14:20 nung ajungshiba angur. Tenyar Paul mapang tamangertemi tanur ama dang bilem aser inyak. Ibayongji, aiben parnok rongnung mangatettep adok. Tanuri pei bilemba dang shitak amato bilemer. Tanuri tarutsü indang mebilemer. Tanuri tamalen inyakba mapatem amadoker.Tanuri peisasa yirutsüsa inyaker aser tangar a yirutsür. Tanur shisatsü nung taaktsü maket aser parnok kolok nung khuretsa bilemba shisatsü mali. Item tanur shisatsütemji kodang taintem dak lidir, iba jagi meputep adokdaktsür aser tanüla mapatem dena takok ngua meinyaktetter. Tanü asenoka tain ser nung tanur ama bilemba purtem jenti lir. Ibayongji, yimten, arogo aser lokti tipdema anir moutetter. Tain ser nung asenok kolok aser temulung nung kibong, yimten, arogo aser lokti atema tebilemtsü kaa shisadangba mali. Asenok tebilemtsü aser khuret tangar nem bendaktsür. Tanüla tsütsüa asenoki tanur ama tangar dak dang imlar. Asen taküm aser kibong asoshi tangar nem dang shisadangdaktsür, tangar nem dang sarasademdaktsür aser tangar dang dang asenok tia asüngdanger. Tsüngrem o bushiba nunga asenok asoshi tangar nem Laishiba bushidaktsür. Adianutem, itemji tanur yimya memesük no ? Iba ama tanur ama bilemba aser inyakba nungi asenok tain maküm tashi asenoki Tsüngrem sentsüwangshidaktsütsüsa kecha meinyaktettsü. Alima nung tapu tapu ataloktsü aser tapu tapu jembitsü, idangji asenoki tanur ama bilemra asenok aoksatsü aser akoksatsü. Iba ama tensa nung asenoki asenoksasa nokdaktettsüsa, Laishibai ashir, temulung nung tangatetba akanga liang aser teshisadang liang .