Bhayyuji Maharaj asüba atema MP CM Chouhan dak tai tongloktsür

Bhopal, Aami (June) 12 (Agencies): Pei sasa tsüngrem nisung ta ajar aser tamangba lennir Bhayyuji Maharaj asüba atema Central Bureau of Investigation (CBI) nem bushisüngdang südakjang ta Madhya Pradesh unit Congress party-i takhangba agütsür.
Tawa tu Madhya Pradesh Chief Minister Shivraj Singh Chouhan-i Bhayyuji Maharaj nem MoS jenjang agütsü aser tanü Indore nung par kidang pa soseta asü.
Madhya Pradesh sorkar aser Chief Minister Shivraj Singh Chouhan nungeri Bhayyuji Maharaj nem khuret agütsü. Chouhan-i Bhayyuji dang par sorkar nung minister akümtsü aser Bharatiya Janata Party (BJP) atema inyaktsü kanga rongshi, ta Congress-i ashi.
State sorkar ajanga agütsüba facility tem Bhayyuji Maharaj-i magizük aser minister akümtsü memulung, ta parnokisa metetdaktsü.
Bhayyuji Maharaj-i Silver Spring nung par kidang pa sasa khaset. Pa Bombay Hospital-i anir ao saka idakji asü, ta Indore Deputy Inspector General HC Mishra-i ashi.
Bhayyuji Maharaj-i shidi ka zülur toktsü aser iba nung pai khuret mokokteter ta shia liasü.
“Nisung kari kibong indang khuret abentsüla. Ni taoer, khuret mokokteter. Tezü tangogo” ta pai shidi nung shia liasü.
Taküm April ita Chouhan’er sorkari Bhayyuji Maharaj nem Minister of State jenjang agütsü saka pai magizük aser ‘tamangba lennir ka atema jenjangji tongtipang masü’ ta langzü.
Bhayyuji Maharaj indang tenüng shitakbaji Uday Singh Deshmukh liasü aser pa sülen anidakertem rongnung yimsüsür aser film actor tem dena liasü.
Pa sülen anidakertem rongnung Maharashtra Chief Minister Devendra Fadnavis aser taoba Tir Pratibha Patil na dena liasü. Bhayyuji ya Uttar Pradesh nunga nüngtugu liasü.
August 2011 nung ochimashi anema rarar Anna Hazare-i lumia lungkak aitba mapang asür Vilasrao Deshmukh-i Anna den jembishinütsü atema Bhayyuji anir ao aser iba ajanga nisungtemi pa tali meteta aküm.
Paisa taoba law minister Salman Khurshid aser Delhi MP Sandeep Dikshit na den yaritepa Lokpal bill yanglu aser ibaji telok anaprongi mulunga agizük.
Bhayyuji Maharaj-i tamangba lennir ka makümdang modeling nunga shilem agidanga liasü.