Prism puri Angh agintsü asoshi khanga Tir dangi shidi zülu

Aizawl, Aami (June) 12 (Agencies): Peoples’ Representation for Identity and Status of Mizoram (Prism) puri Tentonü Tir Ram Nath Kovind dang Angh Kummanam Rajasekharan agintsü asoshi mepeshia shidi ka züluogo. Parnoki ashiba agi pa ya iba menden abentsü asoshi metemsü kechiyong pa politic nung active lir aser kin aser tamangba yimsü dak ajemdaker bendanga inyakba nisung ka lir.
Tir dangi shidi nung party-i ashiba agi, Constitution Article 157 kübok Rajasekharan ya Angh ka ama shimtsü temsüa lir, ajisüaka pa shimba yimya ya Constitution den khenyongi mapet.
Aami (June) 4 nungi 9 tsüngda party puri Angh menden nungi pa agintsü khanga signature campaign ka ayongzük, koba nisung 53,167-i pusema liasü.
Party puri ashiba agi, Mizoram nung taküm küm tatemi election agitsü lir aser parnoki iba nung Rajasekharan shilem dak temulung melemi bilemer.
“Onok Angh ya iba menden mebelenzük tsüngda hopta ishika tejakdang Kerala BJP unit tir liasü. Onoki Mizoram nung aliba nüburtem nükjidong aser tejangraba anema pai inyaktsü ta temulung melemi bilemer,” ta Prism-i ashi.
Maneni party puri ashiba agi, Rajasekharan ya Hindu rightwing activist ka lir aser 1983 küm Nillakal Hindu-Christian mangatettep nung pai shilem agia liasü.