World Day Against Child Labour anogo Dimapur DC-i kaket saya

Subonenba Longkumer Director CECS, Nodal Director CHILDLINE 1098 Nagaland-i züluba kaket ka Dimapur DC, Sushil Kumar Patel IAS-i Aami/June 12, 2018 nü sayatsüba mapang tangokba noksa nung angur.

Dimapur, Aami 12 (TYO): Child labour asoshi alima ajungai rangloka iba yimya aser inyakyim samatsütsü nükjidong nung International Labour Organization (ILO) ajanga World Day Against Child Labour ya 2002 küm tenzük. Küm shia Aami/June 12 nü iba anogomung ajanga sorkar, lokti dentet balala nung mapa inyaker, civil society aser alima ajunga nungi nisung million aika dang child labour agi timtemba aser iba tebilemtsü samadaktsütsü asoshi tesayuba balala agütsür.
Taküm iba anogomung omen ‘Generation Safe a Healthy’ nung ajemdaker Community Educational Centre Society ajanga Aami/June 12, 2018 nü CEC School Campus, Grace Colony Nagarjan nung sentong ka ayongzüka agi aser iba sentong nung tongti tesemdanger ya Sushil Kumar Patel IAS, DC Dimapur liasü.
Child Labour samatsütsü asoshi mapa balala inyaka aser kümzüka/meteta alitsü sentong ayonga agiba asoshi Sushil Kumar Patel-i CECS dang pelaba metetdaktsü.
State nung migrants tem timba Dimapur nung adenshir asünung, sen aatsü nükjidong nung yimdak yimtsüng nungi Dimapur ama yimti aser jila bushia arudang tanurtem dak timba kongshir, ta pai ashi.
Child Labour timtem ya Nagaland aser India nung kisüng masü, saka alima ajunga nung lir, aser iba tebilemtsü ya süoki ia inyaktsü mapang tongogo, ta pai sasa ashi aser nüburtem dang Police helpdesk aser Child Helpline Number tem amshitsü ajungshi.
Paisa NCLP Project Director aser tanga lokti dentet balala dang tanurtemi ajuruba timtem ya tim ketdangsürtem den lemsateptsü ajungshi. Iba amala osang agütsüba ajanga parnok pua temerenshi agütsütsü masü, saka tanurtem aser kibong nung züngsemtem den tim lenmang nung tesayuba balala agütsütsü, ta pai ashi aser District Administration-ia akokba tashi nung yariteptsü mulunga lir, ta shisem.
Iba sentong nung Dimapur DC-i “Exploring Vulnerable Children: A Case of Child labour in Dimapur” kaket sayatsü. Iba kaket nung Dimapur aser Nagaland nung child labour tebilemtsü indang zülua lir.
Iba kaket ya Community Education Centre Society nung Director, Subonenba Longkumer-i zülu. Tang Subonenba Longkumer ya CHILDLINE 1098, Nagaland nung Nodal Director lir aser CHILDLINE India Foundation nung Governing Board Member lir. Taküm tepiyong tajemzük tia nung aliba tanurtem den asoshi mapa inyaka aruba nung ajemdaker mapang talangka nungi kaket zülutsü ya jangra liasü, ta iba kaket züluri ashi.
Iba sentong nung District Child Protection Officer, Dimapur, Pikato E. Tuccu, Asst. Labour Commissioner, Dimapur, W. Temwang Konyak aser NCLP Project Director, Lhangti Konyak nungera demsema liasü.