NDPP ajanga taruba küm nungi school tanurtem admission agitsütsü

Sangtennü Government Primary School, Imkonglenden, Dimapur nung NDPP ketdangsürtemi kaketshir aser tesayurtem nem anüshi (umbrella) angadi lema agütsür tangokba noksa nung angur.

Dimapur, Aami 12 (TYO): Government Primary School, Imkonglenden, Dimapur nung azünger kaketshir ajak indang admission fee ya Nationalist Democratic Progressive Party (NDPP), Dimapur region ajanga agütsütsü lemtetogo. Iba sentong ya state nung tang mezüngbuba inyaktsü lemteter alitsü.
Dimapur region NDPP tir, Kugharo S Aye-i Sangtennü Government Primary School, Imkonglenden, Dimapur nung anüshi (umbrella) angadi lema agütsüba sentong ka agiba mapang ashiba agi, taruba academic session 2019 nungi iba school nung azüngtsüpur kaketshir ajak indang admission fee ya party ajanga menoktsütsü lemtetogo aser akok tashi school nema teyari agütsütsü. School ya ajak indang lir anungji lokti ajungai school aser nüburtem temaba jenjangi ajungkettsü mechi yariteptsüla, ta pai ajungshi.
Tesayurtem ya kaketshir indang tongtiret ka ama lir, anungji tesayurtemi bendanga agütsür nendaka sayutsüla, kechiaser kaketshirtem tarutsü jenjang ya tesayurtem dak metaloka lir, ta paisa iba sentong nung ashi.
Iba sentong agüba süleni parnoki school tanurtem aser tesayur nem anüshi angadi lemtsü aser school telongzük nung süngdong atem.
Kasa sentong nung Imkonglenden GB, Apok Longkumer-ia o tatsüka jembi aser Teacher In-Charge, Aienla-i school indang osangtem agütsü.